Radikalit: Efterskolit iluaqutiginerusariaqarpavut

Kalaallit meerartaat Danmarkimi najugallit amerlanerusut efterskolertittalersigit. Taamaaliornikkut inuiaqatigiinnut akuunerulersinnaapput, Danmarkilu pillugu ilikkagaqarnerullutillu qallunaatut pikkorinnerulersinnaapput. Radikalit Kalaallit Nunaat pillugu oqaaseqartartuat Jeppe Mikkelsen taama isumaqarpoq.
Allattoq Mads Lynge
oktobarip 31-at 2011 14:14

Taanna parteeqatinilu Liv Holm Andersen, kalaallit Danmarkimi meerartaasa atugaat pillugit Christiansborgimi sapaatip-akunnerata siuliani tusarniaasoqareersorlu, aviisimi ullormut saqqummersartumut Informationimi atuartartunut allagaqaateqarput.

- Kalaallit meerartaasa Danmarkimi inuiaqatigiinnut akuunerulernissaannut suliniuteqarnerusariaqarpugut. Taamaammat qallunaatut atuartitsineq pingaarnerutittariaqalerparput, efterskolillu matumani peqataasinnaasorujussuupput, politikerit taakku marluk De Radikaleneersut allapput.

Pilersaarutillu piviusunngussappata kalaallit qallunaallu iluaqutigissavaat:

- Kalaallit meerartaasa Danmarki pillugu ilisimasaqarnerulernissaannut maanna iliuuseqartalereerput, qallunaallu Kalaallit Nunaat kulturiallu pillugu ilikkagaqartarlutik. Taamaammat efterskolit iluaqutiginerusariaqarpavut, De Radikale allapput.

Kalaallit Danmarkimi meerartaat 4500-uupput, taakkunannga 1000-it missaat atukkamikkut ilungersunartorsiortutut nalilerneqartarlutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq