Radareqarani ilaasunik angallassineq ajorineqanngilaq
Disko Line-p ilaasunut angallassissutaa Amaroq radariiaqqalluni Qeqertarsuarniit Aasiiaat aqqusaarlugit Ilulissiarluni sapaatip akunnera kingulleq aallarpoq.
- Pisimasumit siunissamut ilinniutaasinnaasunik pisoqarsimanngitsoq nalilerparput, taamaattumillu aalangerpugut pisimasoq pillugu tamakkiisumik misissuiniarnata, Christian Schiødt Larsen, Den Maritime Havarikommission-inimi imaani ajutoorsimasunik misissuisartoq oqarpoq.
Qulinik ilaasoqarluni marlunnillu inuttaqarluni angallassinera ajorluinnartumik kinguneqangajappoq. Ilaasortaateerarmi anorlerluni nittaaleruttortoq ikkarluit akornannut pigaluarpoq. Ilaasulli oqarasuaataata angallattakkap GPS-ia atorlugu ilaasortaateeraq Ilimanut apuutsinneqarpoq.
Disko Line-llu pisortaa, Frederik Sandgreen, KNR-imut nassuerpoq angallatip naalagaata angallat radariiaqqasoq Qeqertarsuarniit aallannginnermini nalusimanngikkaluaraa.
Kisianni tassa Den Maritime Havarikommissio-imit isumaqanngillat pisoq tamakkiisumik misissuiffigineqartariaqartoq.
Disko Line-p Den Maritime Havarikommission-imut pisoq pillugu nalunaarusiaa KNR-imit pissarsiarisinnaasimanngilarput. Sulianut tamakkiisumik misissuiffigineqarsimanngitsunut paasissutissat tunniunneqartanngimmata.
Den Maritime Havarikommission-i, qallunaat Erhvervs- og Vækstministeriaani nammineq ingerlasutut inissisimavoq, imaani ajutoornernik misissuisartuulluni ajutoornernik pitsaaliuinissaq siunertaralugu.