Raajat ukiuni sisamani kingullerni akitsoriartornerpaasimapput
Akit killiffii 2010-ni aallaaveqarluni naatsorsorneqarput.
2014-imi ukiup sisamararterutiini kingullerni marlunni ineriartorneq kisiat qiviarutsigu, raajat akii 7 procentimik akitsorsimapput.
Piffissarli tamaat qimerloorutsigu, taava raajanik avammut tuniniaasut ineriartorneq nuannaarutigisinnaavaat. Tassami raajat akii 2010-miit maannamut 62,8 procentimik akitsorsimapput.
Kisianni saarulliit avammut tunineqarnerminni akiisa ineriartorneri qimerloorlugit qiimmattarnarpallaangillat. Akit ukioq manna ukiup sisamararterutaasa aappaannut naleqqiullugu 2 procentimik akitsorsimapput.
Saarullit akii 2010-miilli maannamut ataatsimut isigigaanni nikingaarsimangillat, tamanikkornit 3,2 procentiinnarmik akitsorsimagamik.
Akimmi piffissap ingerlanerani malunnaatilimmik nikittarsimagaluarput. Tassalu 2010-mut naleqqiullugit 43 procentinik akisunerusimapput. Kisianni taama pinerat ataasiartaannaavoq, 2011-imi ukiup sisamararterutaasa sisamaanni pilluni.
Qalerallit akii ukioq manna ukiup sisamararterutaasa aappaanniit pingajuannut allanngorsimanngillat.
Kisianni 2010-miit ukioq manna ukiup sisamararterutaasa pingajuannut qalerallit akii 17, 3 procentimik akisunerulersimapput.