Brexit: Raajat saarulliillu nunatsinneersut Tuluit Nunaata akitsuusersornianngilai

Nioqqutissat Tuluit Nunaannut eqqussuunneqartut akitsuutigigallagassaannut allattorsimaffik, Tuluit Nunaanni naalakkersuisut saqqummiuteqammerpaat. Raajallu saarulliillu Kalaallit Nunaanneersut akitsuusersorneqannginnissaat siunniunneqartoq takuneqarsinnaavoq.

Kalaallit Nunaata Tuluit Nunaannut ukiumut tunisartagai 700 millionit koruunit sinnerlugit annertutigisut allattugaatit atuutilerneranit ukioq siulleq akisunerulersitsisumik taamaalillutik akitsuuserneqassanngillat.

Tuluit raajanut saarullinnullu nunatsinneersunik akitsuusersuiniannginnerat, Nunanut allanut naalakkersuisup Ane Lone Baggerip nuannaarutigaa:

- Kalaallit Nunaata raajanik saarullinnillu tunisassiaasa Tuluit Nunaanni akitsuusersorneqarnissaannut ilaannginnera ineriartorneruvoq pitsaasoq, naak aalisakkanik tunisassianik allanik akitsuusersoneqartussanik peqartoq, Ane Lone Bagger oqarpoq, nangillunilu:

- Taamaalilluni ukiumi tulliuttumi Kalaallit Nunaata Tuluit Nunaannut tunisassiaasa maannakkutut unammilleqatigiinnermi ajornerusumut inissittussaanngitsut takuneqarsinnaavoq, akitsuutinimmi akitsorsaataasinnaasunik inissiisoqanngimmat, nunanut allanut naalakkersuisoq Ane Lone Bagger oqarpoq.