Raajat, qalerallit poortuutissallu 400 tonsit igiinnarneqartariaqassapput

Canadamiut kilisaataata F/V Saputip Davisstrædemi iluliarsuarmut apornera pissutigalugu raajat, qalerallit poortuutillu 400 tonsit iginneqartariaqalerput.

Allattoq Ivik Kristiansen

februaarip 27-at 2016 18:29

Taamaammat Kommuneqarfik Sermersuup ingerlatsinermut avatangiisimullu immikkoortortaqarfia eqqakkat pillugit siunnersuisuutitaasuusut, iluarsiinissamut siunnersuuteqarnissamik anguniagaqarlutik Namminersorlutik Oqartussanut saaffiginnipput.

- Suliassaq tamanna qaqutigoortuuvoq imaannaananilu. Kommunimilli Namminersorlutik Oqartussat siunnersorpavut, kilisaatip lastianiittut aalisakkat taakkulu poortuutissartaat tamarmik immikkoortiterneqassasut containerinut arlalinnut, tassani Nuup Amutsivia aamma suliffeqarfik Masik suleqatigineqassallutik, ingerlatsinermut avatangiisinullu pisortaq, Frank Rasmussen oqarpoq.

Poortuutissat tamarmik immikkoortiterneqariarlutik, Nuummi ikuallaavimmukaanneqassasut aalisakkallu asiulereersimasut tamarluinnarmik taamatullu imaq suli laastimiittoq imaanut igiinnarneqassasut siunnersuutigineqarpoq. Aalisakkat sumut iginneqarnissaat Namminersorlutik Oqartussat aalajangissavaat.

Aamma atuaruk Imaani akunnerni 48-ni pissanganartorsiorneq

Aamma atuaruk Canadamiut kilisaataat Nuummut apuutereerpoq

Aamma atuaruk Canadamiut kilisaataat iluliamut aportoq