Raajat qalerallillu aalisarneqartarnerinut inatsit nutaaq aalisartut iluarinngilaat

Raajat qalerallillu aalisarneqartarnerisa nutaamik inatsisiliuunneqarnerat aalisarnermik inuussutissarsiuteqartut akuersaanngilaat.

Kilisaataatillillu tamanna assut kamaatigalugu.

Raajanik pisassiinermi pisat ilanngaasernagit 25 procentii nunami tunisassiorfiusumut tunineqartalissapput.

Taamatuttaaq qalerallit 25 procentii siunissami nunamut tunineqartalissallutik.

Sulisitsisut kattuffiata GA-p ataani aalisarnermi tunisassiornermilu immikkoortortaqarfimmi siulittaasup Søren Brandtip taamatut periuseqarluni inatsisip eqqunneqarnera iluarinngilluinnarpaa. Taanna aperaarput inatsit taanna qanorpiaq ajoqutitaqarsorineraa.

- Iliuuserisassap nutaap sunniutissai 10.000 tonsinik naleqartutut nalilerpavut, taamaattumik ingerlaannaq akuersaarsinnaanngilarput iliuuserisarsimasarlu ajorineqarpat aaqqinniarlugu oqaloqatigiittariaqarpugut, Søren Brandt oqarpoq.

Taanna oqarpoq politikerit ajorisaqarsimagunik oqaloqatiginneqqaarsimasariaqaraluartut.

- Oqaloqatigerusullugit attavigereerpavut paaserusullutigu suna pillugu periuseq taanna allanngortinneqarsimanersoq, oqarpoq.

Søren Brandt isumaqarpoq inatsit taanna pinngitsoornani iluarsaattariaqartoq, tassamigooq imaaliallaannaq 10.000 tonsinik nalilinnik iliuuseqartoqarsinnaanngimmat.

Taanna aperaarput Hans Enoksenip aalisarneq pillugu aaqqissuusseqqinnissamut ukiuni aggersuni siunnersuuteqalersaarnera qanoq igineraat.

- Sunarpiaq ajorineqarnersoq suli paasinikuunngilarput. Paasereerutsiguli soorunami peqataarusussaagut, taama oqarpoq, Sulisitsisut kattuffiata ataani aalisarnermi tunisassiornermilu immikkoortortaqarfimmi siulittaasoq Søren Brandt.