Raajat pillugit nalunaarut raajarnianit isumaqatigiinngissutaaqaaq

Allattoq Jaaku Lyberth
apriilip 20-at 2007 14:48

Raajat pillugit nalunaarut nutaaq, raajarniartartunit isumaqatigiinngissutigineqaqaaq, nalunaarut ullumi inatsisartuni oqaluuserineqartussagaluarpoq, marlunngorpamulli kinguartinneqarpoq.

Avataasiorlutik aalisartut nakkutineqartarnerat pillugu nalunaarut ukiortaamit atuutilerpoq. Raajanik pisassiissutigineqartunit pisarisat maannakkut nalunaarutigineqartalerput, siornatigut tulaassat nalunaarsorneqartarsimagaluarlutik. Nalunaarummi nutaami pisassiissutigineqartut tamakkerneqapallattarput. Ullumi inatsisartut ataatsimiinneranni nalunaarut nutaaq tunuartinneqassanersoq apeqqutinngoraluarpoq, marlunngornermullu oqaluuserineqarnissaa kinguartinneqarpoq.

Polar Seafood nalunaarutip nutaap tunuartinneqarnissaanut tapersersuivoq . Nalunaarutip nutaap atuutilerneratigut kilisaatini inuttat fabrikkinilu sulisut soraarsinneqartariaqassapput, kalaallillu nunaata avammut tunisaqarneranut 120 millioner koruuninik annaasaqaataassalluni.

Niisa Trawl ApS, raajat pillugit nalunaarummut nutaamut tapersersuivoq, siunissami raaqartuaannarnissaq pingaaruteqarmat.

Avataani aalisarnermi sulisunik annaasaqarfiunavianngilaq, tassami raajat ikilippata saarullinniarnikkut fabrikkini sulisut tigummiinnarneqarsinnaammata.

Raajat ikilinerisigut avammut tunisaqarnermi iluanaarutit annikillinavianngillat, raajammi tunineqartartut ikilippata nunarsuarmi tunineqartarnerat akitsussaaq, Niisa Trawl Aps isumaqarpoq. Raajat pillugit nalunaarut inatsisartuni marlunngorpat oqaluuserineqassaaq.