Raajat pillugit aaqqiagiinnginneq unippoq
Raajat akii pillugit aaqqiagiinnginneq naammassivoq. Radioaviisip paasisai naapertorlugit KNAPK Royal Greenlandilu isumaqatigiissimapput.
Taamaalilluni aalisartut tunisiumajunnaarnerat unippoq.
Isumaqatiginninniartut raajat akissaat isumaqatigiissutigineq ajulersimavaat. Royal Greenlandi raajanik 207 millioni koruuninik ukiumut pisisarnissartik aalajangiusimasimavaat, KNAPK-lli aalisartut sinnerlugit 215 millioni koruunit nalinginut pisisarnissaat piumasarisimallugu.
Aaqqiagiinnginneq peqqutigalugu aalisartut raajanik tunisinertik unitsippaat, nalakkersuisunullu millionit sinneri amigaataasut saaffiginnissutigigaluarpaat, iluatsinngitsumik.
Maannali tassa KNAPK-p Royal Greenlandip tunniussinnaasaat isumaqatigilersimavaat. Isumaqatigiissutip nutaap imarisaa suli pisortatigoortumik saqqummiunneqanngilaq, radioaviisillu aallartilaannginnerani KNAPK raajarnianik suli ataatsimeeqateqartoq paasivarput. Isumaqatiginninniarnerup naammassinera unnugu radioaviisimi sammeqqissavarput.
