Raajat ikiliartuaalissangatinneqarput

Raajat imartatsinniittut 1990-ikkut qiteqqunneranniit siorna tikillugu amerliartuaaginnavinnerisa uninnissaat biologinit ilimagineqalersoq, nunatsinni Pinngortitaleriffimmit nalunaarutigineqarpoq.

Raajat amerliartuuaarnerisa unikaallannissaannik Atlantikup Avannaata Kitaani Aalisarneq Pillugu Suleqatigiiffiup NAFO-p, ilisimatuussutsikkut ataatsimiititaliaata aappaagu 2005-imut raajat pillugit siunnersuineranit tunngaveqartoq, Pinngortitaleriffimmit ilisimatitsissutigineqarpoq.

NAFO-p ilimatuussutsikkut ataatsimiititaliaata aappagumut raajat pillugit siunnersuinermini saqqummiuppaa raajartat 130.00 tonsit missaanniittut siunissaq ungasinnerusoq piujuartitsinissarlu eqqarsaatigalugit attatiinnarneqarsinnaanissaat ilimagineqanngitsoq oqaatigaat.

-Taamaattorli raajaqassutsip ullumikkut inissisimanera ima suli pitsaatigaaq, pisanerineqartartut 130.000 tonsit missaaniikkaluarpataluunniit, tamanna raajat ikiliartuutiginavianngikkaat, Helle Siegstad, Pinngortitaleriffimmi aalisakkanut raajanullu immikkoortortaqarfiup pisortaa ilisimatitsivoq.

Biologit ilimagaat raajat pisarineqartartut aappaagu 2005-imi amerlalluarumaartut angisoortaqarluarumaarlutillu. Taamaattorli aamma aappaagumiit raajat ikiliartuaalernissaat naatsorsuutigineqarpoq.

Saarulliit amerliartulissagaluarpata tamanna raajaqassutsimut aamma sunniuteqarsinnaasoq oqaatigineqarpoq.

-1980-kkut naalernerannitulli tassanngaannaq saarullineriataassagaluarpat biologit ilimagaat raajat saarullinnit nerisarineqarnertik pissutigalugu 100.000 tosinut apparnissaat. Biologillu maanna maluginiarsimavaat saarulliit amerlagisassaanngikkaluarlutik takkukkiartuaalersimasut, Helle Siegstad oqarpoq.

Tunumi raajaqassuseq 1999-imiilli pitsanngoriaateqarsimanngimmat Danmarkstrædemut Tunumullu pisassiissutigineqartussatut siunnersuutigineqartut allannguuteqanngillat.

Saattuat pillugit siunnersuineq decembarip aallartinnerani aatsaat saqqummiunneqassaaq, siunersuinissamullu atatillugu ataatsimiititaliaq Canadameersunik, saattuat pillugit immikkut ilisimasalinnik peqataasoqassasoq, Helle Siegstad Pinngortitaleriffimmit ilisimatitsivoq. Hans Larsen paasissutissiivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat