Canadamiut kinguppattaminnik EU-mut eqqussinerminni akitsuutikillisaaffigineqarnissaannik EU-p pilarsaaruteqarneranut tunngasunimik Lars-Emil Johansenip naammagittaalliuutaa, aningaasanut nunanullu allanut naalakkersuisup Josef Motzfeldtip akivaa.
Canadamiut kinguppattaminnik nunanut EU-mi ilaasortanut eqqussisinnaanermut akitsuutaat appartinneqarpat, tamanna nunatsinni sinerissap qanittuani kinguppanniartartunut kingunerlutsitsisinnaasoq, Folketingimi ilaasortaq Lars-Emil Johansen ippassaq uparuaavoq.
Akitsuut appartinneqassappat Canadamiut kinguppattaat uagut kinguppattatsinnit akikinnerusumik tunineqartalissapput.
Raajat EU-mut eqqunneqartartut akitsuutikitsut ukiumut maanna 7000 tonsiupput, taannalu 10.000 tonsinut amerliniarneqarluni.
Tuluit Nunaata, Sverigep kiisalu Danmarkip piumasarisimagaluarpaa raajat akitsuutikitsut EU-mut eqqunneqartartut 22.000 tonsinngortinneqarnissaat, nunattali tamatumunnga akerliuneratigut EU kommissionip aalajangiineq allanngortippaa, akitsuutikitsullu eqqunneqartartut 3000 tonsiinnarnik ilaneqarnissaat, tassa 7000 tonsimiit 10.000 tonsimut.
Aningaasanut nunanullu allanut tunngasunut naalakkersuisoq Josef Motzfeldt taama allappoq.
Raajat akitsuutikitsut EU-mut eqqunneqartartut amerlineqannginnissaat Danmarkip inuussutisssaqarnermut ministeria Hans Christian Schmidt aasaq nunatsinnut tikeraarmat naalakkersuisunit taakkartorneqarsimagaluarpoq.
Hans Christian Schmidt taamani oqarpoq nunatta piumasaqaatai paasisinnaallugit.
Kinguppannik tunisaqartarnerup nunatsinnut pingaaruteqassusia Danmarkip nunanut allanut ministerianut Josef Motzfeldtip tunngavilersuutigisimagaluarpaa.
