KNAPK-mi ilaasortat ullumi raajarniarnertik unitsippassuk, raajat akiinik isumaqatigiinniarneq aatsaat ilungersunarnerulissaaq. KNAPK-p siulittaasua Peter Olsen, oqarpoq akinik isumaqatigiinniarneq suli unittooqqasoq.
- Uuliap akiata qaffannera ilutigalugu raajat akii appariartorsimapput, sulilu orsussap akianik akikillisaaffigineqarnissaq aamma Naalakkersuisunit inissinneqarsimanani. Oktobarimili orsussamik akikillisaavigineqarnissaq KNAPK-miit ujartorsimavarput, ulloq mannali tikillugu orsussamik akikillisaaffigineqarnissamut tunngatillugu pappiaqqamik suli takusimanata. Taamaammat Naalakkersuisut orsussamik akikillisaanissaq eqqarsaatigalugu iliuuseqartarialerput, Peter Olsen KNAPK-p siulittaasua oqarpoq.
Raajarniat isumaqarput Royal Greenland-i ukiumut 215 million koruuninik akiliisassasoq, massakkutut innani, tassa massakkut 200 millionit Royal Greenland-ip akilertarpai. Royal Greenland-ili neqerooruteqareeraluarpoq, tassa 200 millioniniit 207 millioninut qaffaarusulluni neqerooruteqareerpoq.
Raajat akiinik isumaqatigiinnginneq sivisunaarneqassappat fabrikkini raajalerisut eqqugaasinnaapput, ilaatigut Ilulissani raajaleriffik apriilip sisamaani ammarneqaqqittussaagaluaq kinguartinneqarsinnaammat.
Royal Greenland-imi pisortaq Henrik Leth oqarpoq, utaqqiisaasumik aalisakkat qerisut qalerallillu aalisakkerivinni suliarineqartarumaartut.