Raajat akii isumaqatigiissutaajunnaarsinniaraat
Ukiarmi oktobarimi 2005-imi atuutilersumik KNAPK Royal Greenland-ilu raajat sikulersukkat akiinik isumaqatigiissuteqarput. Maannali KNAPK tutsiuppoq, taama isumaqatigiissuteqarsimanertik atuukkunnaarsinniaritsik.
Tamatumunnga KNAPK tunngavilersuivoq, ilaasortani raajarniartut peqatigilluinnarlugit tamanna siunniussimagitsik.
- Ukiuni kingullerni uuliap akiata qaffakkiartupiloornera tunngavigalugu aammalu raajat sikulersukkat akiisa appasinnerujussuat peqqutigalugit raajarniarnerup akilersinnaassusia killissaminut piartulerpoq, KNAPK sinnerlugu, siulittaasoq Peter Olsen oqarpoq.
Taanna qalleqqissaavoq, uuliamut aalisartut tapiissutissaannik oktobarimili naalakkersuisunut noqqaassuteqartarsimagaluarnertik kinguneqartarsimanngitsoq unititsinermut aamma peqqutaaqataasoq.
Royal Greenlandip pisortaqarfianut tamanna pillugu radioavisimiit akititsiniaraluarpugut iluatitsinatali.
Akinik isumaqatigiissutip unitsinniarnera, qaammammik ataatsimik sioqqutsilluni pisussaavoq, allanngortoqassappallu marsip aallaqqaataa tikitsinnagu tamanna pisariaqassalluni.