Raajartassiissutit nungungajalerput
Sinerissamut qanittumi aalisartut septembarip naanerani raajartassamik 77 procentii tulaatereersimalerpaat. Taamaattumik aalisartut piniartullu Kattuffiat KNAPK naalakkersuisunut mianersoqqussuteqarpoq.
Tamatumunnga atatillugu avataasiorlutik raajarniat pisassaraluinik naalakkersuisut sinerissamut qanittumi raajarnianut nuusseqqullugit KNAPK-p kajumissaarpai. Taama piumasaqaateqarput allakkani ammasuni naalakkersuisunut, Aalisarnermut ataatsimiititaliamut Inatsisartunilu partinut assigiinngitsunut ullumi agguaanneqartumi. Pisassiissutinik allannguinerup inatsisartut aalisarnermut inatsimmi allannguilaartariaqarnerat kingunerissavaa, inatsit taanna allanngortinniarlugu ukiuni arlalinni sulisoqareerpoq.
Sinerissap qanittuani aamma avataasiorlutik raajarniartunut pisassiissutit, sinerissap qanittuani raajarniat avataasiorlutik raajarniartunut aningaasarsiornikkut nukittuneroqisunut illersorniarlugit siornatigulli immikkoortinneqarput.
Sinerissamut qanittumi raajarniat amerlanerusunik pisassinneqanngippata, sinerissamut qanittumut raajarniutit pigiinnarneqarsinnaanerat suliffissuillu suliassaqartuaannarsinnaanissaat KNAPK-mit ernumanartoqartinneqarpoq.
