Raajartassat ikilisinneqarpata aalisartut ilungersunartorsiorneruleqqissapput
Illuatungaanili Kalaallit Nunaani sulisitsisut peqatigiiffiat isumalluarpoq.
Raajartassat ikilineqarpata aalisartut akilersuinerminni malinnaaniartorujussuanngussapput. Richardt Efraimsen angallamik 79-erimik Narsami angerlarsimaffeqartumi piginneqataavoq, ullunilu makkunani Ilulissat eqqaani raajarniarpoq. Raajartassat ikilineqarnerisigut raajarniutini inuttat aningaasarsiaqarnerannut ilungersunarnerulissaaq aammalu angallammik ingerlatsinniarneq oqimaannerulissalluni.
Sulisitsisut kattuffiani GA-mi suliassanik ataqatigiissaarisoq Jens K Lyberth isumaqarpoq Biolog-it innersuussutaasa malinneqarnissaat pingaaruteqarluinnartoq. Raajartassiissutitut innersuussutigineqartut Ga-mit tusaatissatut tiguneqarput, erseqqisaassutigalugulu pisassiissutigineqartut malinneqanngippata kingunerisinnaasaat eqqarsaatigineqartariaqarmata.
"Aningaasatigut isertitat sunniuteqanngitssoornavianngillat kisianni tassa nalilerneqartariqarpoq taamatut innersuutit malinneqanngippata qanoq aamma kinguneqarsinnaanera.” Jens K Lyberth oqarpoq.
"Raajat avammut tunineqartut ikiliallannerisigut akit qaffalaarsinnaanerinik aamma kinguneqarsinnaavoq, kisianni apeqqutaavoq aamma nunani allani raajartassat qanoq annertutigisut akuersissutigineqarnersut"
Sulisitsisut Kattuffiani GA-mi suliassanik ataqatigiissaarisoq Jens K Lyberth oqarpoq.KNAPK-p siulittaasua Leif Fontain raajarnianik ataatsimeeqateqartussaagami ilaatigut raajartassat pillugit aatsaat ataatsimeereernermi oqaaseqarusuppoq.
