Raajarniat Royal Greenlandimut tunisiumajunnaarniarput
KNAPK pilersaarpoq ataasinngornermiit raajanik tunisineq unitsinneqassasoq.
KNAPK-p taama iliulersaarnerminut tunngavigaa, Royal Greenlandilu ulluni kingullerni raajat akiinik isumaqatigiissuteqarniarnerigaluartik iluatsinngitsoq akerlilerniaramikku.
- Pissutigaarput ulluni kingullerni KNAPK aamma Royal Greenland-i raajat akii pillugit isumaqatigiinniarneq ingerlavoq, KNAPK-p piumasaa taavalu Royal Greenlandip neqeroorutigisinnaasai imminnut ungasippallaaqimmata allatut ajornartumik tassa KNAPK raajarniat ataatsimeeqatigeerlugit aalajangerpoq tassa akit piumasagut minnerpaat angusinnaanngikkutsigit tassa sakkortuumik qanoq iliortariaqarpugut tassalu Royal Greenlandip suliffeqarfissuanut fabrikkiinut tunisiumajunnaarneq aallartissaaq ataasinngornermi marsip 27-ianinngaanniit, taama oqarpoq KNAPK-p siulittaasua Peter Olsen.
Taanna aamma oqarpoq, isumaqatigiinniarnerminni 14 mio. koruuninik KNAPK-miit piumasaqarsimagaluarlutik akerlianilli Royal Greenland 7 mio. koruuninik isumaqatigiinniuteqarsimasoq, tamannalu KNAPK-miit akuerineqarsinnaannginnerarpaa.
- Akit minnerpaamik piumasagut angusinnaanngilagut ullumikkut raajat akii tunngavigalugit raajarniat ingerlasinnaanngillat aningaasarsiornerat arriitsunnguamut ammut ingerlaruusaarpoq, aserfallatsaaliinernut allanullu assigisaanullu akissaarukkiartorlutik tassa naatsumik oqaatigalugu toqujartorusaaginnarlutik ingerlapput. Taama ingerlaneq qatsuppaat tamaanga killeqartariaqarpoq taama ingerlaneq, taama oqarpoq KNAPK-mi siulittaasoq Peter Olsen.
Royal Greenlandilli pisortaa Henrik Leth allatorluinnaq isumaqarpoq, taanna radio aviisimut oqarpoq arsaq KNAPK-p tigummigaa.
Taassuma taama pisoqartussaanera ajuusaarutigalugu erseqqissaavoq namminneq tungiminniit akinik qaffasinnerusunik pilliuteqarsinnaanatik.
Royal Greenlandimit raajanut akigitinneqartut assigiinngitsut tallimaapput, raajanut minnernut 2 koruuniuvoq annernullu 8 koruuni 25 øre-iulluni. Alluitsu Paanili unammillertaasut suli akisutitsinerulaartut oqaatigineqarpoq.
