Raajarniat naalakkersuisut utaqqiinnalerpaat
KNAPK-p Royal Greenlandillu raajat akiinik isumaqatiginninniarnerat maanna sapaatit akunneri marluk unittooqqavoq, raajarniallu suli aalisarumajunnaaqqapput. 8,1 millioni koruunit amigaatigineqartut naalakkersuisunit tapiissutitut tunniunneqassanersut maanna raajarnianit utaqqiinnarneqarpoq.
Royal Greenland-ip raajanik 207 millioni koruunit nalinginut ukiumut pisisarnissani aalajangiusimalermagu isumaqatiginninniarnerit unittoorput, raajarniallu sapaatit-akunneri marluk maanna aalisarumajunnaaqqapput. Isumaqatiginninniarnerit unittoormata KNAPK Naalakkersuisunut saaffiginnissuteqarpoq, pisorlu suli Naalakkersuisuniippoq.
8,1 millioni koruunit amigaatigineqartut tapiissutitut Naalakkersuisunit tunniunneqarsinnaapput, taamaaliortoqassappalli Aningaasaqarnermut Ataatsimiititaliap akuersineratigut tamanna aatsaat pisinnaavoq. Aningaasaqarnermut Ataatsimiititaliaq pingasunngorpat apriilip ulluisa aqqaneq aappaanni ataatsimiissaaq, raajarniallu utaqqisinneqarnerat sivitsorsarneqaqqissanngippat tassani oqaluuserisassanngortinneqarsinnaavoq.
Naalakkersuisut Siulittaasuat Hans Enoksen, Aningaasaqarnermut Naalakkersuisoq Josef Motzfeldt Aalisanermullu Naalakkersuisoq Finn Karlsen ullaap tungaa ataatsimeeqatigiipput, maannalu apeqqutaalluinnalerpoq, raajarniat piumasaat politikeritnunatta karsianit nassaariniassaneraat.
