Raajarniat aqagumit tunisiumajunnaariaannaapput

Raajat pillugit KNAPKp Royal Greenlandillu isumaqatigiinngilernerat, tunisiumajunnaarnermik kinguneqariaannaavoq. Aningaasat 14 millioni koruunit pineqarput, Royal Greenlandip neqeroorutaasa 7 million koruunit missaanniittut marloriaataat.
Allattoq Najaaraq Egede
marsip 27-at 2006 10:28

Aalisartut piniartullu kattuffiata KNAPK-p piumasatik pinngikkunikkit raajarniat aqaguminngaanniit tunisiumajunnaarsinniaritik, siulittaasoq Peter Olsen oqarpoq.

- KNAPK-p Royal Greenlandimut raajanut akit pillugit isumaqatigiinniarnerat ajalusoormat kalerrinnikuuagut marsip ulluisa 27-ianinngaannit RG-p suliffissuaqarfiinut tunisineq kingulliussasoq, tassa ullumikkut tunisineq kingulliussasoq. Ilaasortatsinnut soorunami nuanninngitsumik kinguneqassaaq, tassa aalisarnerat raajarniarnerat unissaaq inuttaasalu aningaasaqarniarnerat unissalluni. Allatut ajornartumik raajat akii uagut KNAPK-mi ilaasortat raajarniat ataatsimeeqatigereerlugit aalajangersimavugut ullumikkut akit appasippallaaqaat, ingerlatsinermut naammanngimmata, KNAPK-p siulittaasua oqarpoq.

KNAPK-mit 14 millioni koruunit anguniarneqaraluarput Royal Greenlandip 7 millionit neqeroorutigigai.

- Illuatungeriit isumaqatigiinniarnerisa ataasinngormat kingullermik unittoornerata kingorna KNAPK-mit nikeriaqqittoqanngilaq, uffa uagut akinik qaffaareeraluartugut, Royal Greenlandip pisortaa Henrik Leth oqarpoq. Taamaattumik KNAPK-p arsaq maanna tigumigaa. Royal Greenlandip pisortaa KNAPK-mit sianerfigineqarnissaminik utaqqisoq oqarpoq.

Illuatungaani KNAPK-p Royal Greenlandip sianernissaa utaqqivaa.

-Tass’ naluara qaqugu ingerlariaqqissinnaanerluta, tassa maannamut tusagaqanngilagut. Royal Greenlandiminngaanniit imaluunniit politikkikkut oqartussaaninngaanniit arlaannaannilluunniit ullumikkoqqissaaq maannamut tusagaqanngilagut, siulittaasoq Peter Olsen oqarpoq.

Royal Greenland aperaarput sooq 14 millioni koruunit tunniutiinnarusunnginneraat.

-Naamik, akilersinnaanavianngilaq. Nunarsuarmi raajat akii appariartuinnartut eqqarsaatigisariaqarpagut, Henrik Leth erseqqissaavoq.

-Ilisimatitsissutigisinnaavara Canadami Quebecimi raajarniat maanna isumaqatigiinniarfigineqaleruttornerat, tusarparput akitsinni raajarniat akit 20 procentimik appartinnissaat piareersimaffigigaat. Nunarsuarmi unammilleqataassagutta Canadami pisut nalilersuinitsinnut aamma ilaasariaqarput, Henrik Leth oqarpoq.

Raajarniat tunisiumajunaarnerat aqagu aallartissappat Ilulissani Royal Greenlandip suliffissua apriilip aallaqqaataani ammaqqippat sulisut eqqorneqariaannaapput.

Aamma atuaruk