Raajarniarneq suli ilungersunarnerulersinnaavoq

EU-p raajanut akitsuutitaqanngitsunut pisassarititaasut amerligaluttuinnarunigit, soorlu canadarmiut raajarniartuinut, nunatsinni raajarniarneq suli ilungersunarnerulersinnaavoq.

Aalisarnermut piniarnermullu naalakkersuisoq Finn Karlsen, danskit inuussutissalerinermut ministeriannut, sapaatip akunnerani uani tikeraartumut, taama ersaritsigisumik oqariartuuteqarpoq.

EU-Kommissioni maannakkorpiaq raajat akitsuutitaqanngitsut EU-mi tuniniarneqartussat 7.000 tonsiniit 10.000 tonsinut akuersissutiginiarsarivaat. Tamannalu aalisarnermut naalakkersuisoqarfimmit naammagineqanngilluinnarpoq.

Kalaallit raajaataat EU-mut akitsuutitaqanngitsumik aamma tuniniarneqartarput, nunatsinnili raajanik suliffissuaqarneq canadarmiunit akisuneruvoq, taamaammallu raajanik akitsuutitaqanngitsunik pisassanik qaffaaniarneq Kalaallit Nunaannut sakkortusinnaavoq.

Inuussutissalerinermut ministerip EU-Kommissionip sulinera qanoq iliuuseqarfiginiarneraa ulloqeqqanut radioaviisimi tusagaqarfigineqarsinnaavoq.