Raajanut akitsuutit ukiortaamiit qaffassapput

Raajat taamaalillugit akitsuuserneqartalissapput kiilumut akiat 11 koruunit 70 øreqaleraangata, maannamut akitsuuserneqartaraluarput, aatsaat kiilumut 13 koruunilerlugit tunineqaraangata.

Illuatungiliuttut siunnersuummut akerlioqaat. Siumup oqaaseqartuata Hans Enoksenip, Atassutillu oqaaseqartartuata Siverth K. Heilmannip ernummatigaat, inuussutissarsiortut ajornartorsioreeqisut suli artukkerneqaqqissasut, aamma Nunatta raajanik avammut tuniniaanera ajoquserneqassasoq. Ingammik EU-mut raajanik eqqussuinermi akitsuut atorunnaartussanngorunarmat. Taamaalippat assersuutigalugu Canadamiut raajartaat nunatsinni raajartassanut unammillissaqisut oqarput.

Hans Enoksenip aamma siunnersuutigaa, akitsuutitut siunnersuut upernaaru aatsaat aappassaanneerlugu suliarineqassasoq.

- Siunnersut pipallataavallaartumik amigartumillu tungaveqarluni suliaavoq, Hans Enoksen oqarpoq.

Kisianni tamanna ilalerneqanngilaq. Aningaasaqarnermut naalakkersuisup, Palle Christiansenip, aalisarnermullu naalakkersuisup, Ane Hansenip, erseqqissarpaat, kilisaataateqarfiit arfinillit ukiumoortumik naatsorsuutaat aallaavigalugit siunnersuut suliaasoq.

Akileraarutitigut isertitat 9 millioninik amerlinissaannut, kilisaataatillit akisaqarluartut, Naalakkersuisut isumaqarput. Kilisaatatileqatigiit arfinillit 2008-mi ingerlatsinerrminni sinneqartoorutaat akileraarutit peereerlugit 81 millionit koruuniupput. Taakkualu sinneqartoorutit ilagiinnarpaat. Kilisaataatileqatigiit tuniniaasarfimmikkut qanoq sinneqartoortarnersut suli qulaajarneqanngilaq.

Naalakkersuisoqatigiilli illuatungiliuttut ataatsimik ilalerpaat. Tassalu raajanut akitsuusiisarneq akileraartitseriaatsini pitsaanerpaanngitsoq, taamaammallu utaqqiisaasumik aaqqiinerusoq. Allaanerusumik akileraariaaseqalernissaq akitsuuseeriaaseqalernissarlu eqqarsaatigalugit, Naalakkersuisut aalisarnermik inuussutissarsiutillit maanna oqaloqatigisarpaat. Naalakkersuisullu allannguinissamut piareersimapput.

- Kisianni pisuussutinik, inuiaqatigiit tamarmik pigisaannik, atuinermi akiliisoqartassaaq, Palle Christiansen oqarpoq.