Raajanut akitsuut inatsisartut oqaluuserissavaat

Raajanut akitsuutit qaffannissaannik Naalakkersuisut siunnersuutaat, akerleriissutaasoq, Inatsisartuni ullumi siullermeerlugu oqaluuserineqassaaq. Siunnersuut akuerineqassappat, Nunatta Karsiata isertitai 9 millioni koruuninik amerlissapput.
Allattoq Jaaku Lyberth
oktobarip 22-at 2009 07:12

Raajat kiilumut akiat siusinnerusukkut 13 koruuniuleraangat aatsaat akitsuuserneqartarpoq. Raajat kiilumut akiat 11,70 koruuniuleraangat akitsuuserneqartalernissaat, naalakkersuisut siunnersuutigaat.

Raajanut akitsuutit qaffannissaat akitsuutinik iluarsaanikkut Namminersorlutik Oqartussat isertitaasaa amerlisarniarnerannut ilaavoq.

Kisianni raajanut akitsuutit qaffannissaannik siunnersuut, aalisartut akitsuutitigut qaffaavineqarnissaannik siunnersuutip aappariinarpaa.

Siunnersuutip aappaa saarulliit qalerallillu, nunatsinni tunisassiarineqanngitsut, nutaarluinnarmik akitsuuserneqarnissaannik imaqarpoq.

Naalakkersuisut siunnersuutigaat, saarulliit tunisassiorfinnut tulaanneqanngitsut kiilumut 1 koruuninik, qalerallillu tunisassiorfinnut tulaanneqanngitsut kiilumut 2 koruuninik akitsuuserneqassasut.

Akitsuut atuutilissappat, tamanna Nunatta Karsiata 22 millioni koruuninik

isertitsissutiginerussavaa.

Siunnersuutit taakku marluk aalisarnermi inuussutissarsiortunit politikkikkullu akerlerineqaqaaq. Akitsuutissat aningaasanik isaatitsiniutaasut Atassummit oqaatigineqarpoq. Aamma Kalaallit Nunaanni Sulisitsisut Peqatigiiffia oqarpoq, aalisarnermi akitsuutit naapertuilluartuunngitsut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq