Raajanut akitsuut immikkut isaatitsissutaassaaq
Kinguppannut akitsuutip allanngortinneqarujussuarnissaa uani eqqarsaatigineqanngilaq. Kinguppannik avammut nioqquteqarnermut atatillugu assartuinermi aningaasartuutit eqqarsaatigalugit akitsuusersueriaatsimi annikinnerusumik taamaallaat allannguisoqarpoq.
Maannakkumut imaassimagaluarpoq kalaallit tuniniaasartuisa namminneq aalajangertarlugu, Danmarkimi imaluunniit nunani allani pisisup assartuinermi aningaasartuutit akilissanerai. Akigitinneqartoq 11,70 kr. aallaavigalugu akitsuut assigiissoq 0,01 procentiusarpoq. Taannalumi aamma nalimmassarneqartarpoq tuniniaanermi akigitinneqartoq tamatigut 0,01 procentimik qaffakkaangat.
Akitsuut aqqutigalugu Nunata Karsianut 20 millionit koruuninik ukioq-manna isertitsissutaasussatut naatsorsuutigineqarpoq. Allannguinerillu nutaat pilersaarutit malillugit ukiortaamit atuutilersussat Nunatta Karsianut immikkut ittumik 3 millionit koruuninik isertitsissutaassaaq, maannakkut niuernermi periutsit attatiinnarneqassappata.
Aaqqissuussinerup kingunerissavaa, suliffeqarfiit avammut tuniniaanermik ingerlataqartut assartuinermut aningaasartuutissat ilanngutereersimanngikkunikkik akitsuutinut akiliinerunerat, akerlianilli maani suliffeqarfiit tuniniaanermi akigititaminnut assartuinermut aningaasartuutinik ilanngussereersimasut akitsuummut akiliinngitsoortut.
Akitsuummik allannguineq kalaallinut avammut nioqquteqartartunut akigititaminnik allanguititsissappata assartuinermullu aningaasartuutinik akigititaminnut ilanngussineratigut taava tamanna amerlasoorpassuarnut nuannaalersitsissaaq - ingammik kilisaatini inuttat, nunatsinni akigitinneqartut akileraarusersueriaaserlu aallaavigalugit akissarsitinneqartartunut.
Tamannalumi ajunngeqaaq. Kinguppannut akitsuut Kalaallit Nunaanni nunami tunisassiorfinnut tulaassisussaatitaanngitsuinnarnut pisat aallaavigalugit naatsorsorneqartarpoq.