Raajanut akigititaasoq Royal Greenlandip atorunnaarsippaa
Raajat qalaatat qalipaajakkallu tuniniaaviat ajorsiartuinnarmat, KNAPK-mut isumaqatigiissuterput ajoraluartumik taamaatittariaqarparput, raajanut sikulersukkanut akinut tunngatillugu, Henrik Leth oqarpoq. Nangipporlu:
- Raajanik tunisassiorfiit atlantikup avannaaniittut tamarmik tunisassiornertik ajunaarutigaat, assersuutigalugu kujataani tunisassiortoqativut aamma 21,5 millioner koruuninik raajanik tunisassiornertik ukioq kingulleq ajunaarutigigaat tamanna naatsorsuutaanni takuneqarsinnaavoq, taamaammat Alluitsup Paani raajat akii 1 koruunimik oktoberip 15-ianiit apparneqarput, uagut taamatorpiaq aamma inissisimavugut, Henrik Leth oqarpoq.
-KNAPK-lu akikilliliinissaq pillugu isumaqatiginninniassaagut, 1 kruunimik akikilliliinissaq aallarniutigerusullutigu, Henrik Leth oqarpoq.
KNAPK-mi siulittaasoq Peter Olsen, nunarsuarmi raajat akiinik paasiniaatitsilluni oqarpoq. - Ilaasortavut raajat akiisa apparnerisa kingunerisaanik akiliisinnaajunnaassapput, taamaammat akikilliliinissaq isumaqatiginngilluinnarparput, Peter Olsen oqarpoq.
