Nuummi Brugsenip silataani raajanik pisisarneq unitsinneqalerpoq.
Akuerisaanngitsumik tuniniaasarneq umiarsuaatilinnit unitsinniarneqarpoq.
Inerteqqutaagaluartoq, taamaattoq raajat puussiamut kiilup missaannik oqimaassusillit, 30-40 koruunilerlugit pisiarineqarsinnaapput.
Sermitsiaq taama allaaserisaqarpoq.
Raajalli tillitaasarmata, akikitsunnguamillu illoqarfiup qeqqani tuniniarneqartarlutik, umiarsuaatilinnit tamanna unitsinniarneqarpoq.
- Pisiniarfiit Brugsenit Pisiffiillu silataanni raajanik tuniniaasarnerit unitsinneqartariaqarput, raajarniummik Markusimik piginneqataasoq, Knud Trolle oqarpoq.
Taanna naapertorlugu, raajat karsit 5 kiilukkaat raajarniutinit tillinneqartarsimapput, taakkualu aningaasarpaassuarnik naleqarnerarpai.
- Raajarniutit tikissimaneri ingerlaannaq paasineqartalersimapput, tassami illoqarfiup qeqqani raajanik tuniniaasut takuinnarlugit, raajarniutit tikissimaneri paasineqarsinnaalernikuupput, Knud Trolle oqarpoq.
Uumasut nakorsaata aqqusinermi pisiat mianersoqqussutigai, tassamigooq aassimareersut qeriteqqinneqarsimasinnaammata.