Kullorsuaq Terianniaq pissutaagunarluni imermik pilersuineq unippoq

Pumpip tassa imermik milluaassutaata tatsimit Kullorsuarmut pilersuisumit imermik qalluisartup ajoquteqarnera pissutaalluni nunaqarfimmut imermik pilersuineq ulluni kingullerni ajornarsimavoq. Ajoqutaasullu aaqqiiviginiarlugit Nukissiorfinni sulisut sulissutigaat.

Ajoqutit decembarip ulluisa 27-iani paasineqarput teriannisamillu piliarineqarsimanissaa ilimagineqarpoq. Pumpi tatsip eqqaaniittoq pilertortumik iluarsineqarpoq iluarsaassinerulli nalaani tatsip nunaqarfiullu akornanni erngup aqqutaani imeq qerivoq, tamatumalu kingunerisaanik imermik pilersuineq unittoorluni.

Ajoqutaasut annertunerat pissutaalluni ajoraluartumik nunaqarfimmut imermik pilersuineq suli aallarteqqinngilaq, maannakkorpiarlu Nukissiorfinnit kingoraartissat aamma immikkut ikiuuttussat utaqqineqarallarput.

Nukissiorfiit taama nalunaaruteqarput.