Qussummi kuulteqarluarlunilu akuitsumik kanngussaqarluarpoq
Nuna Minerals nutaarsiassatsialannik ullaaq manna nalunaaruteqarpoq, tassa Nuup eqqaani, Qussummi, Nuummiit 60 kilometerinik ungasissusilimmi, 351 kvadratkilometerinillu annertussusilimmi, aasaq misissuinerit ingerlalluarsimasut nalunaarutigigamiuk.
februaarip 04-at 2008 06:21
Nunap qaavani misissuinerit katersorneqarnerisa aamma geofysikimik misissuinerit takutippaat Qussummi eqqaanilu kuultimik kanngussammillu peqarluartoq, Nuna Mineralsimiit taama allaaserinnittoqarpoq.
-Najuulluta misissuinerput isumalluarnartoqartorujussuuvoq. Nunatami kuulteqarluarlunilu akuitsumik kanngussaqarluartoq aatsaat paasivarput, Nuna Mineralsimi pisortaq, Ole Christiansen, oqarpoq.
-Qussummi eqqaanilu ukioq manna 2008-mi qillerisoqarlunilu nunap qaavani sukumiisumik misissuisoqarnissaa maannangaaq pilersaarusiorneqareerpoq. Qulimiguullit atorlugit elektromagnetiskimik atsissuararsuarmik aasaq misissuivugut, inernerillu neriunaateqaqaat, Nuna Mineralsimiit isumalluarpaseqisumik ullaaq nalunaarummi taama allaaserinnittoqarpoq.
