Qupannavaat aallarteqqipput
Nunatsinnili nipilersortartut nipilersoqatigiinnillu aqutsisut pikkorinnersaasa ilaata Arnannguaq Gerstrømip erinarsoqatigiinnik suliniutitut ingerlatsinissaminik akuersineratigut qujanartumik allanngortinneqarpoq.
- Nipilersoqatigiinnut ilinniarfimmi suliniutinut allanut aningaasassaqanngilagut, taamaattorli erinarsoqatigiit ingerlateqqinnissaat nuannaarutigisupilussuuara, Kommuneqarfik Sermersuumi Nipilersoqatigiinnik ilinniarfimmi aqutsisoq Arnannguaq Gerstrøm oqarpoq.
Qupannavaani ilaasortaq Arnaq Petersen erinarsoqatigiinnut akisussaasussatut toqqarsimavaat. Arnaq Petersenip nivissat katersortarnissaat sapaatip-akunneranullu marloriarlutik sungiusartarnissaat isumagissavaa. Kulturikkut illorsuup Katuap suliniut tapersersorlugu erinarsoqatigiit inimik sungiusarfissannik atugassaqartitsissaaq. Arnannguaq Gerstrøm nuutinik piareersaasassaaq, aningaasaateqarfinnut suliffeqarfinnullu aningaasanik taperneqarnissamik qinnuteqaasiortarluni, erinarsoqatigiit Nipilersoqatigiinnut ilinniarfimmut akuutillugit kiisalu erinarsoqatigiinnik aqutsisuulluni.
- KNR-ip aallartisaanermi peqataasinnaasimanera erinarsoqatigiillu uatsinnit aningaasalersorneqaratik ingerlaqqissinnaanerat nuannaarutigeqaara, KNR-ip pisortaanera Søren L. Mortensen oqarpoq.
Qupannavaat arfininngorpat tusarnaarneqarsinnaaleriissapput. Taakku Kommuneqarfik Sermersuup Nipilersoqatigiinnut ilinniarfiutaa peqatigalugu ileqquusumik Ukiortaami tusarnaartitsinermi tusarnaartitsissapput. Tamannalu kulturikkut illorsuarmi Katuami nal. 17.00 pissaaq, tusarnaartitsinerlu akeqassanngilaq.