Qungussutariannguup saqqummersinneqarnera isoraat
Qungussutariannguaq Kinami iluatsiffiulluarpoq, nunarsuarmilu saqqummersitsinersuarmi qallunaat immikkoortortaanni inunnik millionilikkaanik ussatsitsilluni.
Inuit 30.000-it ullut tamaasa Shanghaimi qallunaat immikkoortortaannut ingerlaartarput, nunarsuarmilu saqqummersitsinersuarmi inuit katillugit 6 millionit qungussutariannguup takuniarnissaa angumerisimallugu.
Tamatuma sunniutai inuussutissarsiornermut aningaasaqarnermullu ministerip Brian Mikkelsenip isumalluarfigeqai:
- Taava imaassinnaavoq Danmarkimut takornariat amerleriassasut, qallunaallu nerisassiaat amerlanerusut tunineqartalerlutik, taavalu Lego Grundfossilu, Brian Mikkelsen oqarpoq.
Qungussutariannguulli Kinamut ingerlanneqarnera kamanaatsunik kinguneqarsinnaasoq, Thue Bourup, takornariartitsineq pillugu eqqarsartitani arlaannaannulluunniit attuumassuteqanngitsuni,Tourism Intelligent Institutemi, naliliisarnermut pisortaq isumaqarpoq.
- Tassami Kinamiut immikkoortortatsinnut ingerlaartarput qungussutariannguarlu takujumallugu assilisarlugulu, taavalu nunatta takuniarnissaa imatorsuaq kajumigiunnaartarlugu, tamannaana annilaanngatigigipput.
Kinamiut Danmarkimut ingerlaartittarnissaannut kajungilersitsinissaq Danmarkip ajornartorsiutigereerpaa. Nunani avannarlerni takornariat nunamit allamiut marluuppata aappaa kisimi Danmarkimi unnuisarpoq, Kinamiulli eqqarsaatigigaanni taakkunannga inuit tallimaappata ataaseq kisimi unnuisarluni, Berlingske Business allappoq.
- Taamaalilluta qungussutariannguup qallunaat ilisarnaataattut sunniuteqarsinnaassusia suujunnaarsikkiartuaassavarput, maanna Danmark taamalu aamma Kina nersorneqarunnaarsimapput, tamannalu ajornartorsiutaalluni.
Suliffeqarfik Grundfoss Shanghaimi qallunaat immikkoortortaannut aningaasaliisut annerpaat ilagaat, attaveqarnermullu pisortaata Kim Nørreskibstedip isornartorsiuineq kukkulluinnartuusoraa.
- Isumaqarpunga takornarianik Kinamiunik annaasaqarpallaassanata. Matumani Danmarkip malugeqqunissaa pingaaruteqarpoq, Kinamiullu amerlasoorparujussuit Danmark, qallunaat suliffeqarfii nioqqutissiaallu naluaat.
Thue Bourupilli isummani aalajangiusimavaa, taakkua isumartik namminneq akisussaaffigissavaat, qungussutariannguup assilillugu qiperornera nassiukkaanni Kinamiut takornariat Danmarkimut angalanissaminnut suli soqutiginninnerulissapput qungussutariannguarlu piviusoq takuniarlugu, Thue Bourup naggasiivoq.
