Qungussutariannguaq uppisinneqarsimavoq

Qungussutariannguaq eqqumiitsuliortumit Jens Galschiøtimit Københavnip ilaani Langeliniami inissinneqartoq immamut uppisinneqarsimavoq.
Allattoq Mads Lynge
novembarip 26-at 2009 10:11

Jens Galschiøtimit eqqumiitsuliaq tassaavoq naapertuilluarnerup guutianik taaneqartartoq - Justitia - pualaqisoq - qernertumik amillip saluttup, qitini tikillugu immamiittup, tunuani amaartittoq takuneqarsinnaavoq.

Silap pissusaata allanngoriartornerata Afrikamut sunniuteqaatai eqqarsaatigalugit eqqumiitsuliortup Jens Galschiøtip Københavnip ilaani Langeliniami eqqumiitsuliaminik saqqummersitsivoq.

Nunat pisuut silap pissusaata allanngoriartorneranut atatillugu ileqqorissaartuusaarnerat naapertuilluarniartuusaarnerallu eqqumiitsuliap takutinniarpaalusooq.

Eqqumiitsulialli inissisimaffimminiinnginnera ippigalugu, Jens Galschiøtimut siarnguttoqaannarmat, Jens Galschiøt Langelinialiarpoq.

- Tupigusulluinnarpunga. Nalulluinnarpara qanoq pisoqarsimanersoq, Jens Galschiøt oqarpoq.

Taanna Odenseminngaanniit ullaaq Københavniliapallappoq, eqqumiitsuliarlu krani atorlugu immamiit qaqinneqarpoq.