Qungasersuut ilisimatuunit misissuivigineqassapput
Ilisimatuut qallunaat, svenskit canadamiullu 40-t Sydafrikamukarlutik qaammatip tulliani aallassapput, qungasersuut qanimut misissugariartorlugit.
- Qungasersuut pitsaasorujussuarmik immaqa atorsinnaasatsinnik periuseqarput, ilisimatooq Aarhusimeersoq, Sydafrikamullu angalaqataasussaq, Emil Brøndum Danmarks Radiomut oqarpoq.
Taassuma nassuiarpaa, qungasersuut imerniarlutik niaqqutik ammoortikkaangamikkik, soorlugooq aappillertassagaluartut, soorlu uagut inuit taamaattartugut, qungasersuulli aappillerneq ajorput. Aavat qungasianut katersortarpoq, sikingajunnaaraangatalu aavat qungasianiit uummataannut ingerlaqqittarpoq.
- Taava uummataat tillerluarnerulersarpoq, aallu annertunerusoq niaquannut pisarpoq. Taamaammat qungasersuut ilisimajunnaarneq ajorput, Emil Brøndum nassuiaavoq.
Qungasersuut 35-t ilisimatuut atortulerniarpaat, uummataasa nalaanni niaquinilu aammik uuttortaasinnaasunik, taava uummammik taqarsuisigut sooq napparsimalerneq ajornersut taamaalillutik paasissavaat.
