Qunerseeq Rosingip assilisai atuaganngorput

Nunatsinni kalaallip arnap assiliisartutut ilinniagaqarsimasut siullersaata Qunerseeq Rosing-ip, 1900-kkut qeqqata nalaani, sineriak tamakkiusarlugu angalasarnerpassuarminit assilisarpassuinik saqqummersitsineq, Katuami ippassaq ammarneqarpoq. Qunerseeq Rosing-ip assilisarpassuisa atuaganngortinneqarnerat aamma ilisaritinneqarluni. Qunerseeq Rosingip maanna 70-inik ukioqartup assiliisunngorniarnera ajornaatsuinnaasimanngilaq.

- Eqqumiitsuliorneq soqutigisorujusuugakku. Taamanikkut Danmarkimi ministeriaqarallarmat taakku aalajangertaramikku suna ilinniassaneripput, taava eqqumiitsuliornermut taamani ilinniarusukkaluarama itigarterujussuarpaannga. ”Atorfissaqanngillat taamattut Kalaallit Nunanni” taamatut oqalurtik. Taava isumaliorpunga, immaqa assiliisunnguinnallaruma, taannami pilerigigakku. Aamma tassa itigartikkaluarpaannga nunatsinni assiliisut atorfissaqannginnerarlugit sygeplejerskinngoqquaannga (peqqissaasoq). Taamalu uanga sygeplejerskimut tulluutinngik.

Ajungaaniarlunga ajungaaniarlunga ajugaavunga assiliisumullu ilinnialerlunga.

Ilinniareerami nunatsinni assiliisutut inuussutissarsiuteqarniarnini ajornaatsuinnaanngimmat allatut aallartissimavoq.

- Periarfissaqannginnama suliffissaqannginnama anera Jensi Itinnerani tuttunik paarsisoq ornippara, taakkunanilu tuttunik paarsisunngorlunga. Taavali paasilerparput sunaaffa Tuberkoluseqalersimasunga, Sanamilu uninngavunga ukiup affaani. Tassaniitillunga misissuutip sineriammut angalanissaa periareersarneqarpoq, nutserisussatullu tassani atorfinippunga.

Qunerseeq Rosing-ip misisuummi sulisunerminut atatillugu sineriak tamangajaat angallavigaa taamaallillunilu assilisarpassuaqalerpoq ullumikkut atuaganngorlugu isiginnaarneqarsinnaasunik. Atuakkap imai inuttaata ima nassuiarpai:

- Tassa inuit atuakkami takuneqarsinnaapput soorlu Upernaviup eqqaani najugallit aappariit. Taakku ornippakka ullorlu tamaat pulaarlugit, nereqatigalugit assilisaarlugillu.

Qunerseeq Rosing-ip 1959-imiit 1992-imut inuunerup qanoq ittuuneranik assilisai atuakkiami takuneqarsinnaapput. Asserpassuit piviusunngortinneqarnerat ajornaatsuinnaasimanngilaq.

- Nuannertartorujussuuvoq ilaanni, kisiannili aamma qiiaallunga kaallunga iserfissaqarnanga, tamakkorpassuit tamaasa atortarsimavakka. Angallateerannguani ilaalluni qiaallani, tamakku tamaasa aqqusaarnikuuakka.

- Assilisassakka ornikkusukkakkit tamakku tamaasa atortarsimavakka, ajunngilaq, Eventyr. Qunerseeq Rosing qungujulluni taama oqarpoq.

Atuakkamik assilisarpassuinik imalimmut saqqummersitseqataavoq soraluaa Tupaarnaq Rosing Olsen. Atuagarlu ateqarpoq ”Inuit”. Taanna Nuummi atuagaarniarfinni pisiarineqarsinnaalereerpoq sineriammullu siammarterneqarnissaa tulliulluni. Qunerseeq Rosingip assilisaanik Katuami saqqummersitsineq decembarip 18-iannut killeqarpoq.