Qummoroortaatit pillugit maleruagassat sukaterneqalerput
Koldingimi qummoroortartuliorfiup ajutoorujussuarnerata kingornagut qummoroortartuerniarnermi qummoroortartunillu toqqorsimasuuteqarnermi malittarisassat Namminersornerullutik Oqartussat sukaternialerpaat.
Kommunit qummoroortartuerniallu tusarniarneqareerput, malittarisassallu nutaat naalakkersuisunit sapaatip-akunnerata naanerani akuerineqassagunartut Namminersornerullutik Oqartussanit Bjørn Bihl oqarpoq.
Qummoroortaatinik toqqorsiviit, soorlu containerit sanaartukkanut minnerpaamik 25 meterinik ungasissusilimmut inissinneqartalissapput, malittarisassallu sinneri kingusinnerusukkut ilisimatitsisutigineqarumaartut erseqqissaatigaattaaq.
Malittarisassat Danmarkimi atuuttunut assingupput, immikkullu qinnuteqartut itigartinneqartassallutik.
Maleruagassat sukaterneqarnerat tuniniaasartut iluarisimaarpaat.
Qummoroortaatinik isumannaannerusumik toqqorsimasuuteqartalernissamut isumaqataallutik pisiniarfinnilu ikinnerusunik ilioraasalersinnaallutik Nuummi Brugsenimi uddeleri pisiniarfiutillillu peqatigiiffianni siulittaasoq Niels Mathiassen oqarpoq. Containerilli qummoroortaatinik imallit inissinneqarnissaannut 5 meterinik akunnilersuinissaq pisiniarfiit ilaannut ajornassangatippaa.
