Qummoroortaatinut inatsisit nutaat malinneqarput

decembarip 27-at 2004 14:42

Qummoroortartunut inatsisit nutaat atortinneqarput

Ukiutoqarnissaa tullinnguuppoq. Sinerissamilu pisiniarfippassuit juullerpaluttunik tunisaqarluareersut tamatumuuna qummoroortartorpassuarnik ukiup matuma sinnerani tuniniaalereerput. Danmarkimi Koldingimi novembarimi sakkortuumik qaartoortoqarnerata kingorna, qummoroortartunut inatsisit sukannernerulersinneqarput, tamannalu Nuummi qatserisartut pisiniarfinnut qummoroortartuerniartunut ullumi nakkutilliineranni malinnaaffigalugit maluginiarparput. Nuummi qatserisartut ittuat Knud Petersen oqarpoq nuummi pisiniarfiit qummoroortartuerniarlutik ullumikkut aallartittut amerlanersaasa inatsisit malikkaat. Ataaserli mianersoqquneqarsimavoq:

-Ingerlannarlugilli tunisassani aaqqissivai. Tassa kisianni ukiutoqqami qummoroortartornissap tungaanut pisiniarfiit tuniniaasut taamaasa alakkertertassavagut, tuniakkanillu aaqiisimanngikkaangata, politiit ingerlannaq kalerrissinnaavagut, unioqqutitsisoqarsimappallu politiit qatserisartullu tuniniaanermik matutitsinissamut piginnaatitaapput.

Qummoroortaatini angisuut battereersuillu qatserisartunit maluginiarneqarnerusartut oqaatigaa, taakku 25-30 kiilut angullugit oqimaassuseqakkajummata.

- Tassa annerpaamik 50 kilo angunagu pisiniarfimmiititaqartussaapput, pisiniarfiullu silataani 100 kilo angunagu toqqorsimatitsisinnaallutik, tamannalu unioqqutinneqarpat qummoroortaatit illoqarfiup avataanukaassinnaavagut, Knud Petersen oqarpoq. Pisiniat qanoq annertutigisumik qummoroortaatisinnaanerannik aperineqarami oqarpoq, inuit ataasiakkaat tamanna namminneq akisussaaffigingaat, pisiniarfiit pisisunik nakkutilliisinnaatitaanngimmata. Taamaattorli inatsisini piumasaqaataavoq annerpaamik qummoroortaatinik 5 kilo qaangernagu angerlarsimaffimmiittoqarnissaa.

Sinerissamissaaq nunaqarfinni illoqarfinnilu tamaginni qatserisartut politiit suleqatigalugit qummoroortartunik tuniniaasunik nakkutilliissapput.