Qummoroortaatinit ajoqusertoqanngilaq
Innersuussutit pitsaasut, soorlu illersuutinik isaruaqarnissaq aamma qummoroortaatinut aallanngitsoortunut ornigutinnginnissaq paasilluarsimagunarpavut.
Allattoq Elisa Isaksen
Taamaalillunimi sineriak tamakkerlugu, ukiutoqqami qummoroortaatinit ajoqusertoqarsimanngilaq.
Tamanna sinerissami napparsimmavinnut ullumi sianeqattaarnitsigut paasivarput.
- Eqqissisimasumik ukiutoqarsiorpugut, aamma inuit imminut mianerinissartik illersuutinillu isaruaqarnissartik eqqumaffiginerulersimagunarpaat, soorlu Sisimiut napparsimmavianniit taama oqartoqarpoq.
Nuummi qummoroortaatinit ajoqusertoqarsimanersoq oqaatigineqarsinnaanngikkallarpoq. Nuummi nakorsaanerup Jesper Olesenip tamanna aatsaat ataasinngorpat oqaatigisinnaanerarpaa.
Nunatsinni aamma siorna qummoroortaatinit annerusumik ajoqusertoqanngilaq.