Qummoroortaatinik tillittut tigusariaqarput

Angut 25-inik ukiulik tillinniarnernut atatillugu juulliaraq aqaguttoq tigusarineqarpoq kingusinnerusukkullu killisiorneqarluni. Angut januaarip ulluisa arfineq-pingajuata tungaanut tigummigallarneqassasoq Nuummi eqqartuussiviup aalajangiiffigaa. Taannali Nunatta Eqqartuussivianut ingerlateqqinneqarpoq, tassanilu angutip tigummigallagassanngortinneqarnerata sivitsorneqarnissaa aalajangerneqarpoq, angut 25-inik ukiulik januaarip 20-iata tungaanut tigummigallagassanngortinneqarami.

Aamma politiit biilinik illoqarfimmi kaajallaatillutik ippassaq sapaammi ullaaralaakkut arfinernut qiteqquttoq angutit marluk karsersuarnik marlunnik akiartut siumorpaat.

Angutit taakku politiit takuinnarlugit tigummiatik igiinnarlugit qimaammata malinneqarput, aappaalu tigusarineqarmat paasineqarpoq illoqarfiup ilaani containerimi qummoroortaatinik ukiutoqqami atugassaminnik tillinniarsimasut. Tillitat inuttaannut utertinneqareerput angutillu inuusuttut taakku marluk pinerluuteqarsimanertik pillugu eqqartuussisulersuunneqassapput.

Pisulli taakkuinnaasimanngillat. Nuummi politiit illuni inissianilu eqqissiviilliornerit 23-t orniguffigisariaqarsimavaat, marluk meerartallit.

16-it imigassaq peqqutigalugu eqqissiviilliortitsinerusimapput.

Inuillu 17-it aalakoorpallaartut politiit isumagisariaqarsimavaat tillinniarnerillu pingasut ornittariaqarsimallugit.

Biilinik aallarussinerit aamma pingasuusimapput, imigassartorsimallunilu biilertoq ataaseq naammattoorneqarsimalluni.