Qummoroortaatinik nioqquteqartartoq piumaffigineqarpallaarsorivoq
Qummoortaatit pisiniarfinni paarineqartarnerat pillugu malittariasassat sukannernerusut qanittukkut atuutilissapput. Koldingimi issaq qaartoornerujussuup kinguneri amiilaarnartut taamaalillutik nunatsinnissaaq malunniutissapput. Malittarisassalli allanngortinneqarnerat ingasattajaarneruspq qummoroortaatinik nioqquteqartut ilaat isumaqarpoq.
Malittarisassat nutaat naapertorlugit pisiniarfiup ataatsip iluani qummoroortaatit qaartartullu allat amerlanerpaamik 50 kiilut pigineqarsinnaapput, ininilu nioqquteqarfiup saniani amerlanerpaamik 100 kiilut toqqortaatigineqarsinnaallutik.
Illoqarfiup ilaani inissiaqarfiusumi pisiniarfiilluunniit katersuussimaffigisaanni, tassa inuppassuit angallaffigisaanni, qaartartut amerlanerpaamik 150 kiilut pigineqarsinnaapput. Tamaani containerit peqqumaasivigineqarsinnaanngillat.
Umiarsualivinni, illoqannginnersani suliffeqarfiillu katersorsimaffiini qummoroortaatit annerpaamik 500 kiilut ataatsikkut pigineqarsinnaapput, tamaanilu containerit atorneqarsinnaapput. Kisianni qummoroortaataasivik kaajallallugu 25 miiterit iluanni illoqarluniluunniit containereqassanngilaq. Tamanna Leif Pedersenip ingasappallaarsoraa.
- 25 miiterit aalajangiusimaneqassappata assersuutigalugu Nuup illoqarfiata iluani qummoroortaatinik tuniniaaffeqarsinnaanngilaq, tamaanimi illut taama qanitsigisut tamanna eqqortinneqarsinnaanngilaq, Leif Pedersen oqarpoq.
Malittarisassat nutaat nioqquteqartartunut kommuninullu tusarniaassutigineqaqqammerput, Leif Pedersenilu tusariarneqarsimasut ilagaat. Isumaqarpoq pingaartumik illumiit illumut 25-miiterinik ungasissusiliisimaneq allanngortinneqartariaqartoq. Ukiuni 25-ni qaartartunik qummoroortaatinillu nioqquteqartuusimagami taama sukaterineq ingasatajaarnertut isigisariaqarsoraa, isumaqarluni qummoroortaatit qaartartullu isumannaannerujussuanngorsimasut atuisunullu ulorianannginnerulerlutik.
