Qummoroortaatinik nioqquteqarneq nakkutigineqarpoq

decembarip 27-at 2004 11:00

Ukiutoqarnissaanut ullut pingasuinnanngorput. Nunatsinnilu ukiutoqqap ukiortaallu naapinneranut qummoroortartortarneq atatinneqarluinnartarpoq.

Qumoortartornermullu malittarisassat ukioq manna sukannernerupput.

Nunatsinni Danmarkimilu qummoroortartunik toqqorsivimmiititsinermi tuniniaanermilu malittarisassat ukioq manna atuutsilersumik sukannernerulerput, Danmarkimi, Koldingimi novembarip pingajuanni qummoroortartunik toqqorsiviup annertuumik qaartoorfiunerata kingorna.

Nuummi pisiniarfiit qummoroortartuerniartussat ullaaq tuniniaalermata, Nuummi qatserisartut nakkutilliillutik aallartipput, qummoroortartuerniarnermillu nakkutilliineq tuniniaanerup uninnissaata tungaanut ingerlanneqassasoq, Nuummi qatserisartut ittuat Knud Petersen ilisimatitsivoq.

Sinerissamissaaq inoqarfinni tamaginni qatserisartoqarfiit politiit suleqatigalugit qummoroortartunik tuniniaasunik nakkutilliissapput.

- Sinerissamilu pisiniarfiit tamarmik pisussaatitaapput maleruagassat malissallugit, vicepoliti inspektør Karl Henrik Simonsen oqarpoq.

Qummoroortartunik atuinermut tunngatillugu sillimanissakkut inatsisit nutaat malillugit pisiniarfiit tuniniaasut, tuniniaasinnaanermut akuerineqarsimassapput, tuniniaanerullu nalaani qummoroortartut pisiniarfimiitinneqartut 50 kg-nit oqimaannerussanngillat. Taavalu qummoroortartut pisiniarfiit tuniniaasut eqqaanni inissisimatinneqartut annerpaamik 100 kg-nik toqqortaateqarsinnatitaapput. Angerlarsimaffinnut tunngatillugu malittarisassanit inassutigineqarpoq, qummoroortartunik annerpaamik 5 kilo-nik angerlarsimaffimmiititsisoqarnissaa.

Containerillu qummoroortartunik toqqorsiviit illoqarfiup avataanutinneqarnissaat peqqussutaavoq.