Qummoroortaatinik akornusersuisoqassanngilaq

Ukioq nutaaq iserfigineqarpoq qummoroortartorpassuarnik aallartitsilluni. Ukiutoqarsiornerullu avataatigut qummoroortaatinik atuineq aamma malittarisassaqarpoq.
Allattoq Noah Mølgaard
januaarip 01-at 2012 12:50

Qummoroortartut tusintilikkaat aallartinnerisigut ukiortaaq Nunatsinni iserfigineqarpoq. Qummoroortaatillu qalipaatigissorsuit ukiutoqarsiutiginerisa kingorna ulluni allani atussagaanni inuit allat eqqarsaatigisariaqarput.

- Qummoroortaatinik atuineq politiit malittarisassaanni ilaavoq. Taanna malillugu pisariaqanngitsumik nipiliornikkut inuit allat akornusersorneqartussaanngillat, politimesterimut tullersortaagallartoq Helle Olesen KNR-imut nassuiaavoq.

- Tassa imaappoq ullup qanoq ilinerani qummoroortaatinik atuineq eqqarsaatigisariaqarpoq. Pitsaavallaarunanngilarmi arfininngornermi ullaakkut imaluunniit inuit innareersut qummoroortaatinik aallartitsigaanni, Helle Olesen nassuiaavoq.