Qullissat pillugit katersugaasivinni saqqummersitsilerput

Aamarsuarsiorfiusimasup Qullissat matuneqarnerat, ukiut 40-t matuma siorna pisoq, pingaarnerutillugu samminiarlugu, Katersugaasiviit ukiormanna toqqarpaat, ilaatigut assinik saqqummersitsinikkut.

Ukiut 40-t matuma siorna, ulluni makkunani, septembarimi 1972-imi, Qullissani innuttaasut amiakkuulersimasut nalunaarfigineqarput illoqarfik qimassagaat, qaammallu ataaseq qaangiummat atorfilittat kingulliit illoqarfik qimappaat kingornalu pisortatigoortumik matuneqarsimasutut oqaatigineqarluni.

Misigisaq annilaarnartoq nuutsitaanerup malitsigisaa piffissap ingerlanerani saammariartorsimavoq, taamaattorli eqqaamasat suli atapput. Qullissat oqaluffiat Ilulissanut nuunneqarpoq, nipilersoriaatsillu Vaigat-imeersut suli Qullissanik eqqaasittarpaatigut, peqatigiiffiit ”Qullissat Ikinngutai” peqatigalugit tassaammata eqqaamasanik uaniittuusisitsisut, soorlu aasaq manna amerlasuunit illoqarfiusimasumut kingumut tikeraallatsiartunit misigineqarsinnaasimasoq.

Sapaammi  novembarip sisamaani nalunaaqutaq ataatsimit sisamanut Qaasuitsup Kommuniani katersugaasiviit inuit taakku ukiut 40-t matuma siorna illoqarfimminnik - Qullissanik - qimatsisariaqarsimasut pillugit assinik eqqaaniutaasunik saqqummersitsiniarput.

Aasaq Qullissani naapisimaarneq pillugu aallakaatitassiaq uani takusinnaavat: /da/tv/qullissat-230920121