Qullissat Paninnguup isaanik
Qalipakkat katillugit 14-it amerlanersaat nutaajullutik saqqummernikuunngitsut. Saqqummersitanut ilaapput qalipagaq William Jessen-ip Qullissani kæmnereqarfimmik qalipagaa – aammalu Jens Leibhardt-illu qalipagaa ”Kangilliit”. Qalipakkat 12-it Malînánguaq Marcussen Mølgaardip suliarai.
”Ukiaq manna ukiut 40-it qaangiunneranut atatillugu saqqummersitsinissara siornali pilersaarutigilerpara. Uani Qullissat - tassanilu inuuneq ”qalipakkatut” tammatsaalinissaat uannut pingaaruneruvoq, tamakku qaqugumut pioqqullugit, ilarpassuimi takussaajunnaareermata. Nunataa kisiat pinnagu aammali qaarusummi sulineq, sassat, Qullissat ukiami, ikaartarfissuaq allallu saqqummersitanut ilaapput.” Malînánguaq Marcussen Mølgaard oqarpoq.
Saqqummersitsineq Qullissarmiunut arnanut angutinullu taamani sulilluarsimaqisunut ataqqinninniarneruvoq. Minnerunngitsumik angutinut ilungersorlutik qaarusummi sulisimasumut pigititaalluni.
”Immikkut aataga Kristian Markussen (Kalissi) ukiorpassuarni qaarusummi ilungersorluni sulisimasoq, taassumalu suleqatigisarsimasai angutit nukittuut, kiisalu arnat, ningiut aamma tapersersuilluarsimaqisut ilaqutariinnillu napatitseqataasimasut ataqqiniarlugit saqqummersitsivunga. Taakku eqqaaneqarneri ataqqinartuullik ” Malînánguaq oqarpoq.
Malînanguaq Qullissarmiunit taaneqartarpoq ”Paninnguaq” taamaammat saqqummersitsineq ateqarpoq ”Qullissat – Paninnguup isaanik”
Saqqummerisitsineq ammassaaq tall. 26.okt. nal. 15.00 Nuummi Galleri-Malînánguaq-mi Avannarliit 17-imi ammassaaq. Ammaanermi Pele Møller vaigaterpalaartunik appisimaassaaq.
