'Qullissara' inuppassuarnit nuannarineqarpoq
Aamaruutissarsiorfiusimasup, Qullissat, inuerunneraniit ukiut 40-t qaangiunnerat malunnartinniarlugu tusarnaartitsineq oqaluttuartulerlugu 'Qullissara' inuit 5.400-it tusarnaariarsimavaat. Nunatta Isiginnaartitsisarfia tusagassiuutinut taama nalunaaruteqarpoq.
- Ilimagisamit sippulimmik nuannarineqarsimavoq, aamma allassimavoq.
Qullissat Katersortarfiani aasaq juulip ulluisa arfernganni takutinneqaqqaarmalli angalaarunneqarnerani tusarnaartitsinerit ulikkaavittarsimapput.
'Qullissara'-mi peqataasut inuit aqqanillit Ilulissani, Qasigiannguani, Aasianni, Sisimiuni, Maniitsumi, Nuummi, Qaqortumi Nanortalimmilu tusarnaartitsipput. Taamaallaat illoqarfinni pilersaarutaasuni Narsaq, silap ajornera pissutaalluni, tikinneqanngitsoorpoq.
-Ataatsimut qaammat ataaseq angalareerlutik Kimmernaq Kjeldsen, Miké F. Thomsen, Hans Jørgen Damgaard, Jens Nielsen, Fabrizio Barzanti & Pilu Noahsen Nanortalimmiit Nuummut tikipput, nunatsinni nuannarineqarnerpaallutik!, taama Nunatta Isiginnaartitsisarfia tusagassiuutinut nalunaaruteqarnerminni allapput.