Qullissani aasaru naapeqatigiittoqassaaq

Qullissani aasaru juulimi kingumut katerittoqassaaq. Silami sceneqassaaq, tassanilu nipilersornerit, isiginnaartitsinerit, oqallinnerit, takutitsinerit assigiinngitsut aliikkusersuinerillu pisassapput.
Allattoq Elisa Isaksen
maajip 07-at 2008 05:18

Naapeqatigiinnissaq ukioq-manna qulequtserneqarpoq: ”Ataasiuvugut”.

Qullissat katersortarfiat neriniartarfittut, pisiniarfittut, eqqumiitsulianik saqqummersitsivittut allatullu ulluni taakkunani atorneqassaaq, sceneli silamiittoq aliikkusersuinernut amerlanernut atorneqassalluni.

Peqataasussat tupernik namminneq nassassapput, illulli inigineqanngitsut unnuiffissatut aamma suliarineqarsinnaassapput, naapeqatigiittoqarneranilu najugaqarfigineqarsinnaassallutik.

Piorsarsimassutsikkut suliaqartut, peqatigiiffiit, kattuffiit, suliniaqatigiiffiit piorsarsimassutsimullu soqutiginnittut kikkulluunniit tamaasa aaqqissuisunit kajumissaarneqarput QUTDLISSAT-ni INUAQERPALAAQ-mut suleqataaqqullugit. Katerinneq imigassartaqangitsumik ilaqutariinnut kikkunnulluunniit ingerlanneqassaaq.

Aaqqissuussineq Qutdlissat Ikinngutaanit aaqqissuunneqarpoq, pissallunilu juulip 13-ianniit 20-ata tungaanut.