Qullissani aasarsiorneq ullumi ammarpoq
Katersortarfimmi unnugu nerersuaqatigiinnermi Ilulissani Qullissat Ikinngutaasa siulittaasuat Thorkild Jeremiassen oqalugiassaaq, oqalugiareerpat Naalakkersuisut siulittaasuat Kuupik Kleist aamma oqalugiassalluni. Aaasarsioqatigiinnissami pilersaarummi allassimasoqanngilaq, Kuupik Kleist, qullissarmiuusoq, pisortatigoortumik oqalugiassanersoq.
Pilersaarutit naapertorlugit iliveqarfimmi ullumi nalunaaqutaq ataatsimut kransiliisoqassaaq. Nunatta Isiginnaartitsisarfiata isiginnaagassiani ”Qullissat” unnugu isiginnaartitsissutigeqqaassavaa. Isiginnaartitsissutaassalluni Qullissat 1924-mi inoqalersoq ukiullu 40-it matuma siorna inueruttoq. Isiginnaagassiami Vajgat Orkesterip nipilersortarsimassaat aamma appisimaartassavaat, soorlu aamma qullisarmiuusimasut pillugit isiginnaartitsisoqassalluni.
Aasarsioqatigiinnermi pisussat pingaarnerit ilaat tassaavoq Sumekkut tusaarnaatitsinissaat. Sumekkullu aqagu arfininngornermi nalunaaqutaq 22.00 appissapput. Ilanngullugu oqaatigisinnaavarput Sumekkut Qullissani kingullermik ukiut 35-it matuma siorna appisimaarmata.
Thorkild Jeremiassen KNR-mut ukioq aallartissimalersoq oqaluttuarpoq inuit ikinnerpaamik 400-it takkunnissaat ilimanartoq, erseqqissaalluni inuit taama amerlatigisut peqaajartussasut immikkut malunnartitsisoqartussaammat. Nalinginnaasumik Qullissat maajimit septembarimut 200-inik inoqartarpoq.
Aasarsioqatigiineq pingasunngorpat juulip 11-anni naggaserneqassaaq.
