Qulliit unnugu qaminngatinneqassapput
Siunertaavoq silap pissusaata allanngoriartornerata kingunerisaanik pinngortitamik mingutsitsinermik millisaaqatigiinnissaq.
Pinngortitaq pillugu nunarsuaq tamakkerlugu suliniaqatigiiffik WWF Earth Hour-imik taallugu iliuuseqaqatigiinnissamik aalajangersaasuuvoq. Aaqqissuussamik qullernik qaminngatitsineq siulleq Australiami Sydney-mi 2007-imi pivoq. Nunat maannamut 84-it, illoqarfiillu 2.848-t innuttaasa nalunaaquttap akunnerani ataatsimi qullernik qaminngatitsiniarnertik nalunaarutigereerpaat. Nunatsinni kommuneqarfiit marluk Kommuneqarfik Sermersooq aamma Kommune Kujalleq peqataaniarput.
CO2-mik aniatitsinermik millisaaqataaniarputtaaq New York, London, Bangkok, Beijing, Moskva. Allaammi nunarsuarmi sanaartukkat tusaamasat napasuliarsuaq Eiffeli Parisimiittoq, Romami Piitap oqaluffissua, Sydney-mi operamik tusarnaartitsisarfissuaq, New Yorkimi allaffeqarfissuaq Empire State Building aamma San Fransiscomi ikaartarfissuaq Golden Gate Bridge qullerminnik qaminngatitsissapput.
Maani nunatsinni Kommuneqarfik Sermersooq qullernik qaminngatitsinissamut peqataatitsiniartoq Nukissiorfiit suleqatigalugu, assersuutigalugu Nuummi aqquserngit qulliisa ilaat unnugu qaminngatissavaat.
Innuttaasullu kaammattorneqarput namminneq aamma angerlarsimaffimminni qullernik unnugu qulingiluat qeqqaniit qulit qeqqata tungaanut qaminngatitseqqullugit.
- Isummerit silallu pissusaata allanngoriartorneranut naaggaarlutit. Qulliit pærii atuinikinnerusunik taarsikkit, imeq sipaaruk, biilernak ilaalu ilanngullugit. Kalaallit Nunaanni pinngortitaq ukiut 50-it qaangiuppata taamaaginnaqqullugu iliuuseqaqataagit, Kommuneqarfik Sermersooq kaammattuivoq.
