Qulliit Sermersuumi qaminneqassanngillat
Taamaasilluni Kommuneqarfik Sermersuumi allaffinni kommunillu suliffeqarfiini qulliit tamavimmik qaminneqassanngillat.
Silap allanngoriartornerata ernumanartortai ersersinniarlugit, Earth Hour-imik taaguuserlugu, siorna aaqqissuussisoqarmat, Nuummi aqqusernit qullii tamarmik qaminngatinneqarput. Ukiormannalu pingaarnersiuinermi tamanna tunulliunneqartariaqarsimasoq, kommunaldirektøri Thorkild Lauridsen oqarpoq.
- Taamatut aaqqissuussineq Nukissiorfik suleqatigalugu aatsaat piviusunngortinneqarsinnaavoq, suliassaq kommunip kisimiilluni kivissinnaanngimmagu, ukiormannalu taamatut isumaqatigiittoqarsimanngilaq, Thorkild Lauridsen oqarpoq.
Earth Hourimik taaguuserlugu qullernik qaminnganitsinissamik aaqqissuussineq, pinngortitaq pillugu nunarsuaq tamakkerlugu suliniaqatigiiffimmit, WWF-imit, kaammattuutaavoq. Illoqarfiit 4.000-it nunallu 88-it qaminngaarnermut siorna peqataapput.
Qeqqata Kommuniani allafinni kommunillu suliffeqarfiini tamani qulliit qaminngatinneqassasut, kommunimit ilisimatitsissutigineqarpoq, taamatullu aaqqissuussineq Kommune Kujallermit Kommuneqarfillu Sermersuumit peqataaffigineqassanngilaq.
