Qulliit juullerpaluttut innaallagissamik atuinerulersippaatigut

Tunissutissat qituttut manngertullu pisiarissagaanni akisusaqaat. Aqajaqqup inuulluataarnissaanut, unnussiuaarlunilu inuulluataarnissaq inissaqartuaannartarput. Kallerup inneranut atuineq aamma juullip qaammataani qaffangaatsiartarpoq. Nukissiorfiup kallerup inneranut sipaarniarnermut innersuutai takukkit.
Allattoq Per Andersen
decembarip 06-at 2011 08:16

Nuummi, Sisimiuni Qaqortumilu siorna juullip qaammataani 15 millioner koruunit angullugit kallerup inneranut aningaasartuuteqarput, ukioq mannalu atuinerup apparnissaa ilimanaateqarani. Kallerup innerata juullip qaammataani qaffangaatsiartarnera, sapaassuit aallartinnerini qulliit juullerpaluttut amerlaqisut atorneqangaatsiartarnerannik peqquteqartarpoq.

Kisitsisit Nukissiorfimmiit takutippaat Sisimiuni 6.000-t missaannik inuttussusilimmi, siorna decemberip qaammataani fire millioner koruunit missaannik kallerup inneranut aningaasartuutaasimasut, qaammatip ataatsip siornatigut aningaasartuutit 3 milliuuniusimallutik.

Qaqortumi aningaasartuutit 2 millioner koruunit missaaniissimapput, qaammatip ataatsip  siornatigut aningaasartuutit 1,9 milliuunit missaanniissimallutik. Nuummi innuuttaasut 15.000-t missaanniittut siorna aningaasartuutigisimavaat 9,4 millioner koruunit, qaammatip ataatsip siorna novembarimi aningaasartuutit 8 millioner koruunit missaaniissimallutik.

Nukissiorfiit KNR-mut nalunaarutigaat, kallerup inneranut atuineq juulliaqqap aqagunnerani decembarip 23-ani qaffangaatsiartartoq. Tassani amerlasuut kaageeraliorlutik, mamartunillu sanaartortarnerat peqqutaasartoq nalunaarutigaat.

Kallerullu inneranut atuinerit appartissinaavat, taamaasillutit januari takisuumik taasagaat aallartinnginnerani ileqqaaruteqarlutit.

Nukissiorfiup kallerup inneranut sipaarniarnermik siunnersuutai qulit aajuku:
1. Qulleq qamittaruk
Qulleq qimaleraangakku qamittaruk.

2. Pærit atuinikitsut atulikkit
Pærit atuinikitsut pærinit nalinginnaasuninngarnit sarfap taamaallaat sisamararterutaa atortarpaat. Taakku saniatigut 5 – 15-riaammik atasinnaassuseqarput.

3. Seqersimatitsinissamut halogen kisiat atortaruk sarfakillisaamullu ikittaat qamittaruk
Qulliit halogenitortut voltikitsut sarfakillisaammik atuinissamut piareersimatinneqartarput qullerluunniit qaminneqaraluarpat. Tamanna pinaveersimatinniarlugu sarfakillisaat iikkami ikkuffikkut aamma qaminneqassaaq.

4. Piareersimatitsissut (standby) atoqinagu
Qarasaasiaq TV-lu pillugit sarfamik sipaaruserfiit pisiarikkit. Sarfamik sipaaruserfiit atortut sarfamut ataneri nammineersumik qamittarpai, soorlu skærmit, printerit, dvd-afspillerit, spillekonsolit allallu, qarasaasiaq TV-luunniit qaminneqaraangat. Piareersimatitsissummik atuineq qulleeqqat aappaluttut qorsuilluunniit ikumanerisigut takuneqarsinnaavoq, taakku illit atuinivit tamarmiusup 10 – 15 %-iata missaat atuiffigigajuttarpaat.

5. Qarasaasiq angallattagaq fladskærmilu pisiarikkit
Taakku affaannarmik sarfatortarput qarasaasianut aalaakkaasunut skærmitoqqanullu sanilliullugit.

6. Maskiinat ulikkaarlugit immertakkit
Makiinat errorsiviit erruiviillu aallartinnginneranni ulikkaarlugit immertakkit kissarnikinnerumaamullu inissittakkit. Qalaassisarneq atortarunnaaruk. Errortassat qalipaatillit 30° C-imi errorneqarsinnaalluarput.  

7. Manisisarit
Panersiivik atornaveersaarallaak errortatillu manisakkit. Panersiivik atussagukku errortat siggoqqissaareersimanissaat isumagisaruk.

8. Nillissusissaq allanngutsaalioruk
Nillataartitsiviup qerititsiviullu nillissusaat alaatsinaattaruk. Nillernerugaangata sarfaq annertunerusoq atorneqartarpoq. Nillataartitsivimmi nillissusissaq eqqartoq 5° C-iuvoq qerititsivimmilu -18° C-iulluni. Nillissuseq ataatsimik appartikkaangakku sarfamik atuineq 5 % tikillugu annertusisarpoq.

9. Nerisassiorneq
Naatsitat imililaaginnarlugit qalaattakkit igarlu matulertaruk. Naatsiiat imililaaginnarlugit qalaattat sarfap 30 %-ia tikillugu sipaartittarput. Siatsivikkut nerisassiussaguit siatsivik kissasseqqaassanngilat. Siatsivik immeruk siatallu naammassinissaat 5 - 10 minutsinik sioqqullugu qamittarlugu.

10. A-mik nalunaaqutsikkat toqqartakkit
Angerlarsimaffimmi atortut sarfatornikkaat pisiarissagukkit tamatigut A-mik nalunaaqutsikkat toqqartakkit. A+ aamma A++ nillataartitsivinnut qerititsivinnullu A ilisarnaataavoq imermik sarfamillu atuinikissutsimut.

Illoqarfigisanni kallerup inneranut qanoq akiliuteqartarnerlutit ataani linkeq toorlugu takusinnaavatit.