Qulliarnermik nappaammik Tuluit Nunaanni kingumut naammattuuisoqarpoq
Qulliarnermik nappaammik ukiut arfinillit ingerlaneranni naammattoorsisoqanngereersorlu Tuluit Nunaanni kingumut naammattoorsisoqarpoq, tamannalu ilungersorlutik siaruaatitinnaveersaarpaat.
aggustip 04-at 2007 13:15
Ajutoornermut sillimanissamullu Naalakkersuisut ataatsimiititaliaat ullumi ataatsimeeqatigeerlugit, Tuluit Nunaanni ministeriuneq, Gordon Brown, Danmarks Radio naapertorlugu, oqarpoq, oqartussaasut suna tamaat atorlugu maanna iliuuseqarnialersut.
Tuluit Nunaanni 2001-imisut qulliarnersuaqalernissaa ernummatigineqarpoq, nunaateqarnermi taamanikkut eqqugaarujussuarmat.
Neqit Tuluit Nunaanneersut EU-p ilutigalugu aamma anniseqqusaajunnaartinniarpai, ataasinngornermiit tamanna immaqa aallarteriissalluni.
