Qullersat Nuummut tikeraarput

aggustip 29-at 2006 10:43

Danskit inatsisinik atortitsinermut ministereqarfianni qullersat Nuummut ulluni makkunani tikeraarput.

Danskit inatsisinik atortitsinermut ministeriat, Lene Espersen, folketingimilu eqqartuussiveqarnermi ataatsimiitsitaliami ilaasortat, tikeraarput. Massakkorpiarlu inatsisinik atortitsinermut naalakkersuisoq Aleqa Hammond inatsisartullu inatsisinik atortitsinermut ataatsimiititaliaat ataatsimeeqatigaat. Ataatsimiinneq pingaaruteqartorujussuusoq naalakkersuisunut ilaasortaq oqarpoq.

- Eqqartuussiveqarnerup ulluni makkunani inissisimanera, eqqartuussiveqarnerullu aaqqissuuteqqinnissaa, ataatsimiinnitsinni eqqartussavavut. Aaqqissuusseqqinnissap siunissami ungasinnerusumi pisussaanera tamatumunnga pissutaavoq, Aleqa Hammond ataatsimiinneq aallartinngitsiartoq oqarpoq.

Pineqaatissinneqarsimasut inissiisarfianiittussatut utaqqisartut immikkut danskit inatsisinut atortitsinermut ministerianit siunnersuusiorfigineqarnissaat aaqqissuusseqqinnissallu tungaanut nunatsinni inatsisitigut isumannaatsuutitsiniarnerup qulakkeerneqarnissaa Aleqa Hammondip ujartorpaa ataatsimiinnermilu angusaqarluassalluni neriulluarpoq. Lene Espersen juunip qaammataani ataatsimeeqatigigamiuk aporfiusinnaasut saqqummiussimavai.

- Aaqqiissutissatut siunnersuutit Nuummut tikeraarnermini nassassallugit neriorsuinikuuvoq, taamaattumik angusaqarluarnissarput neriuutigaara, Aleqa Hammond oqarpoq.