Qullartaasiaq motoorilik issittumi nakkutilliinermut piukkunneqartoq

- Qullartaasiaq motoorilik pineqarpoq, taannalu oqartussaasut ilisimatuullu issittumi suliaqarnerminni arlalitsigut iluaqutigilluarsinnaavaat, ilisimatuut siuttuat, Jean Botti, timmisartunik saqqummersitsinermi taama oqarpoq.

EADS, Airbusip timmisartuliorfissuata ilagivaa, qullartaasiallu motoorillip sananeqarnerani Canadami sakkutuut timmisartortart suleqatigineqarsimapput.

Qullartaasiaq motoorilik ulluni 40-ni angalasinnaavoq, assigiinngitsunillu aamma useqarsinnaalluni, soorlu assersuutigalugu ujaasinermi annaassiniarnermilu atugassanik.

Issittup imartaata ammaraluttuinnarneri ilutigalugu, qullartaasiap motoorillip avatangiisinik, pinngortitamik, uumasunik, umiarsuillu uuliakoornerinik kiisalu imaatigut nalinginnaasumik angallannermik nakkutilliinissaa eqqarsaataavoq.

- Silaannarmi sumiiffimmi aalajangersimasumi sivisuumik uninngaguit, takusaqarluarnerusinnaavutit. Soorlu assersuutigalugu umiarsuaq uuliakuussagaluarpat. Qaammataanik ingerlaartumik nakkutilliinermit iluaqutissartaqarneroqaaq, Jean Botti oqarpoq.

Tropospheric Airship meterinik 90-inik takitigivoq, meterinik 80-inik nerututigaluni, meterinillu arfineq pingasuinnarnik portussuseqarluni.

Jean Botto naapertorlugu, qullartaasiaq motoorilik nal. ak. kilometerinik 150-inik sukkatigisumik ingerlaarsinnaavoq, sivisuumillu angalassagaangami ingerlaartillu nal. ak. kilometerinik 60-inik sukkassuseqakkajutassalluni.

- Issittoq nunanit tamalaanit isiginiarneqaleraluttuinnarpoq. Issittumi inuilaani nakkutilliinermut teknologiinik sivisuumik atorsinnaasunik, qullartaasiatta motoorillip assinganik, pisariaqartitsisoqarnera takusinnaavarput, Jean Botti oqarpoq.

Video uani takuuk: http://www.youtube.com/watch?v=5_2bnYnjB44