Ilulissat: Qulisamik arsaattarfittaarniaqatigiit borgmesterimik suleqateqarnialersut

Avannaata Kommuniani kommunalbestyrelsip suliniut, katillugu 140 mio. koruuninik akeqartussatut tagginneqarsimasoq, aningaasaateqarfinnut qinnuteqartarnerani Avannaata Kommunianit peqataaffigineqartassanersoq aalajangiiffigissavaa.

Peqatigiiffimmimi siulersuisut, Ilulissani arsaattarfimmik qulisamik, aamma kulturikkut pikialaartitsinermi allatigut atorneqarsinnaasunik, pilersitsiniarlutik suliniuteqartut Avannaata Kommunianik suleqateqarnialerput. Taamaaliornermikkut neriuutigivaat aningaasaateqarfinnit angisuunit tapiiffigineqarsinnaanissartik.

- Nalituvoq aningaasat tungaatigut. Taamaattumik imaasiallaannaq piviusunngorsinnaasimanngilaq, peqatigiiffimmi siulittaasoq, Niels Davidsen, oqarpoq.

Peqatigiiffiup arsaattarfik qulisaq, FIFA-llu arsaattarfiit angissusaanut piumasaqaataatut angissuseqartussatut pilersaarutigineqartoq, pilersinnissaa siunertarivaa.

- Massakkut qujanartumik Avannaata Kommunia suleqatigilerparput piviusunngornissaa neriuutigalugu ajornannginnerussasoq, Niels Davidsen oqarpoq.

Peqatigiiffiummi Danmarkimi aningaasaateqarfiit annersaasa ilaat, A.P. Møller Fonden, siornaak aningaasatigut tapiisussatut iluatsingajassimavaa. Aningaasalli Nunatsinni suliniummut allamut tunniunneqarsimapput.

- Taamaattumik suliassamut uunga, Multiarenassamut, qanittuaraangaluartugut oqaatigineqarsinnaavoq, Niels Davidsen oqarpoq.

Avannaata Kommuniani kommunalbestyrelsi sapaatip akunnerani uani ataatsimiilerpat politikerit arsaattarfissamut qulisamut Avannaata Kommunia suleqataalissanersoq eqqartorlugu aalajangiiffigissavaat.

- Aamma isussuunneqarnikuungatta fondininngaanniit pisortat tunuliaqutaappata, taava pilersaarutip pilersinneqarnissaa tuaviornerusumik pisinnaasoq. Aammalu aningaasalersorneqarnissaa ajornannginnerussasoq, Avannaata Kommuniani borgmesteri, Palle Jeremiassen (S) oqarpoq. Taassumalu suliniut inuttut tapersersortuarsimallugu isertuutinngilaa.

- Tassa soqutigiuarnikuuara Multihalip pilersinneqarnissaa. Aamma Ilulissani timersortarfiit eqqarsaatigigaanni pisariaqarpoq timersortarfiit ilanissai. Aammalu arlaatigut piorsaqqinnissaat, oqarpoq.

Ilulissani qulisamik arsaattarfiliornissamut suliniut ukiuni arlalinni ingerlanneqarnikuuvoq.