Qulingiluanik ukiulik ujarassiornermi ajugaasoq
Aanani pisuttuaqatigalugu ujaqqamik nassaaminik Ujarassiorimut nassitsisimasoq, niviarsiaraq qulingiluanik ukiulik, Lucia Mølgård Kitsissuarsunneersoq akissarsiassat annerpaartaanik 55.000 koruuninik akissarsivoq.
Lucia Mølgård oqaluttuarpoq, ujarak nassaarigamiuk aanaminut takutissimallugu, aanamilu ilanngullugu Ujarassiorimut nassiussassanngortsissimagaa. Akissarsiani qarasaasiamik mobiltelefonimillu pisissutigissallugit aamma oqarpoq.
Lucia Mølgårdip ujarak kanngussammik zinkimillu akulik nassaarisimavaa.
Akissarsiassat tullii 35.000 koruuninik aningaasartalik Kangaamiormiumut tunniunneqarpoq.
Pingajui marluk 16.000 koruuninik aningaasartallit Kullorsuarmiumut Arsummiumullu tunniunneqarlutik.
Akissarsisinneqartut sisamaat pingasut, Arsummiumut, Siorapalummiumut kiisalu Innaarsummiumut 6.000 koruuninik aningaasartallit tunniunneqarput.
Ujaqqat akissarsissutigineqartut ilaatigut kuultimik, siilvimik, aqerlumik, kanngussammik, nikkilimik saviminissamillu akoqarput.
Ujarassiorimit akissarsisinneqartut tamarmik nunaqarfimmeersuupput, ukiunilu 16-ini Ujarassiorip ingerlasimanerani nunaqarfimmiuunerusut nassitsisartut Greenland Resources nalunaarpoq.
